భారత్, పాకిస్థాన్ మధ్య ప్రతిష్టాత్మకంగా నిర్మిస్తున్న కర్తార్పూర్ నడవా విషయంలో తాజాగా ఓ అడ్డంకి ఏర్పడింది. రావి నదిపై వంతెన నిర్మించాలా లేదా రోడ్డు వేయాలా అనే అంశంలో ఇరుదేశాల నిపుణుల మధ్య తలెత్తిన బేధాభిప్రాయాలే ఇందుకు కారణం.
కర్తార్పూర్ జీరో పాయింట్ వద్ద నడవా నిర్మాణ విధివిధానాలు చర్చించడానికి సోమవారం పాకిస్థాన్, భారత్ నిపుణులు సమావేశమయ్యారు. ఓ గంటపాటు జరిగిన ఈ భేటీలో కారిడార్ నిర్మాణ పనుల వివరాలను పరస్పరం ఇచ్చిపుచ్చుకున్నారు.
వంతెనా? రోడ్డా?
రావి నదిపై తరచూ ఉద్ధృతంగా వరదలు వస్తుంటాయి కనుక ఓ కిలోమీటర్ పొడవైన వంతెన నిర్మించాలని భారత నిపుణులు ప్రతిపాదించారు. అయితే రహదారి నిర్మిస్తే సరిపోతుందని పాక్ నిపుణులు అభిప్రాయపడ్డారు. రహదారి వంపు అధికంగా ఉంచడం వల్ల వరద మప్పును సమర్థంగా ఎదుర్కొనవచ్చని తెలిపారు. ఈ విషయంలో ఇరు దేశాల ప్రతినిధులు ఒక నిర్ణయానికి రాలేకపోయారు. తదుపరి సమావేశం తేదీపైనా దాయాది దేశాల మధ్య ఏకాభిప్రాయం కుదరలేదు.
ఇదీ విషయం..
సిక్కులకు అత్యంత పవిత్ర ప్రదేశాల్లో... పాకిస్థాన్ కర్తార్పూర్లోని గురుద్వారా దర్బార్ సాహెబ్ ఒకటి కాగా, మరొకటి (భారత్) పంజాబ్ గురుదాస్పుర్లోని డేరాబాబా నానక్ మందిరం. ఈ రెండు సిక్కు పవిత్ర క్షేత్రాలను అనుసంధానం చేసేదే కర్తార్పూర్ నడవా.
2018 నవంబర్లో కర్తార్పూర్ నడవా నిర్మాణం చేపట్టాలని భారత్, పాక్ నిర్ణాయానికి వచ్చాయి.
గురునానక్ జయంతికి పూర్తయ్యేనా...?
సిక్కుల మత గురువు గురునానక్ 550వ జయంతోత్సవాలు నవంబర్లో జరగనున్నాయి. అప్పటికల్లా ఈ కర్తార్పూర్ నడవా నిర్మాణం పూర్తి చేయాలని పాక్ చెబుతోంది. ఇది పూర్తయితే ఇరుదేశాల సిక్కులకు వీసాలేకుండానే తమ పవిత్ర క్షేత్రాలను దర్శించుకునే అవకాశం కలుగుతుంది.
ఇదీ చూడండి: అప్పుడు నెహ్రూ, రాజీవ్... ఇప్పుడు మోదీ: రజనీ