భారీ వర్షాలు, వరదలతో ఒడిశా గజగజ వణుకిపోతోంది. నదులు, వాగులు ఉప్పొంగి చాలా ప్రాంతాలు నీటమునిగాయి. గ్రామాల మధ్య సంబంధాలు తెగిపోయాయి. ఒడిశా విపత్తు రాపిడ్ యాక్షన్ ఫోర్స్( ఓడీఆర్ఏఎఫ్) సిబ్బంది.. వరదల్లో చిక్కుకున్న వారిని సురక్షిత ప్రాంతాలకు తరలిస్తున్నారు.
" కటక్కు చెందిన ఓడీఆర్ఏఎఫ్ సిబ్బంది.. పంగట గ్రామంలో ఇద్దరు, తకుర్పుర్ గ్రామంలో నలుగురు వరదల్లో చిక్కుకుని ఇంటి పైకప్పుపై ఉండగా.. వారిని రక్షించారు. అలాగే తకుర్పన్నా గ్రామానికి చెందిన పక్షవాత రోగిని కాపాడి ఆసుపత్రిలో చేర్చారు. బంకసాహిలో వరదల్లో చిక్కుకున్న 10 మందిని కాపాడి.. కథూరి శిబిరానికి తరలించారు."
- ఒడిశా పోలీసులు
ఉప్పొంగిన మహానది..
హిరాకుడ్ డ్యాం 46 గేట్లు ఎత్తిన నేపథ్యంలో మహానది ఉగ్రరూపం దాల్చింది. కటక్లోని ముందులి బ్యారేజీ నిండుకుండలా మారింది. బౌధ్, ఖోర్ధా, బర్గాఢ్, ఝర్సుగుడా జిల్లాలోని లోతట్టు ప్రాంతాలు నీటమునిగాయి. కృష్ణ మొహనపుర్ సమీపంలోని జగన్నాథ రోడ్డు వంతెనపై ఎనిమిది అడుగుల మేర వరద ప్రవహిస్తోంది. బౌధ్ నగరంలో వరద నీరు సెంట్రల్ స్కూల్, హాస్టళ్లలోకి చేరింది. సుమారు 500 మందిని ఆరు శిబిరాలకు తరలించారు అధికారులు.
ఇదీ చూడండి: మధ్యప్రదేశ్ను ముంచెత్తిన వరదలు.. ఒకరు మృతి
