ఉపాధ్యాయులకు ప్రపంచాన్ని మార్చే శక్తి ఉంటుందంటారు.. ఆ మాట ఝార్ఖండ్లో అక్షర సత్యమైంది. అవును, కరోనా కారణంగా ఆన్లైన్ క్లాసులమయమైన విద్యార్థుల ప్రపంచాన్ని... లౌడ్స్పీకర్లతో మార్చేశారు డుమ్కా జిల్లాలోని ఓ పాఠశాల ప్రధానోపాధ్యాయులు శ్యాంకిషోర్ సింగ్ గాంధీ.
పిల్లల పరిస్థితి విని...
లాక్డౌన్ వేళ ఆన్లైన్ క్లాసులు విద్యార్థులకు బాగానే ఉపయోగపడుతున్నా.. చదువు'కొనలేని' పేద విద్యార్థులు మాత్రం దిక్కుతోచని స్థితిలో పడ్డారు. కంప్యూటర్లు, స్మార్ట్ ఫోన్లు లేక..., అవి ఉన్నా గ్రామాల్లో మొబైల్ సిగ్నల్స్, కరెంటు లేక... ఆన్లైన్ క్లాసులు వినడం అసాధ్యంగా మారింది. దీంతో, బంకటి గ్రామంలోని విద్యార్థుల కోసం హెడ్మాస్టర్ శ్యాం ఓ ఉపాయం చేశారు.
కొన్ని లౌడ్ స్పీకర్లు తెచ్చి చెట్లకు, స్తంభాలకు కట్టేశారు. ఏప్రిల్ 16 నుంచి రోజుకు రెండు గంటల పాటు పాఠాలు బోధిస్తున్నారు.
"ఆ స్కూల్లో 1వ తరగతి నుంచి 8 తరగతి చదువుతున్న మొత్తం విద్యార్థుల సంఖ్య 246. కానీ అందులో 204 మందికి అసలు మొబైల్ ఫోన్లే లేవు. మరి అలాంటప్పుడు వారి చదువు సాగేదెలా? అందుకే, ఈ ఉపాయం చేశాం. ఎవరికైనా అర్థం కాకపోతే.. వారి అనుమానాలను ఎవరి ఫోన్లో నుంచైనా మాకు మెసేజ్ చేస్తే.. మేము వాటిని మరుసటి రోజు వివరిస్తాం. ఈ కొత్త పద్ధతి విద్యార్థులకు బాగా నచ్చింది. పాఠాల్ని బాగా అర్థం చేసుకుంటున్నారు. "
-శ్యాంకిషోర్ సింగ్ గాంధీ, ప్రధానోపాధ్యాయులు
ఒకేసారి అందరూ చదువుకోవచ్చు...
కేరళ వాలన్చెరీలోని 9వ తరగతి విద్యార్థి ఆన్లైన్ క్లాసులకు హాజరు కాలేకపోయినందుకు ఒంటికి నిప్పంటించుకుంది. ఇలాంటి పరిస్థితి మరే విద్యార్థికి రాకూడదని పేద పిల్లల వసతుల గురించి ఆలోచించి... ఈ లౌడ్ స్పీకర్ క్లాసులు పెట్టిన శ్యాం ఆలోచనకు సర్వత్రా ప్రశంసలు అందుతున్నాయి. డుమ్కా జిల్లా విద్యాధికారి పూనమ్ కుమారి.. జిల్లాలోని 2,317 ప్రభుత్వ పాఠశాలలు ఇదే పద్ధతిని అనుసరించి.. విద్యార్థులకు ఇబ్బంది లేకుండా, సిలబస్ పూర్తి చేయాలని ఆదేశాలు జారీ చేశారు.
ఇదీ చదవండి:వారికి స్మార్ట్ఫోన్లే లేవ్- మరి ఆన్లైన్లో చదువెలా?
