ఇంటెల్, సీబీఎస్ఈ సంస్థలు ప్రపంచ రికార్డును ఖాతాలో వేసుకున్నాయి. 24 గంటల్లోనే అత్యధిక మందికి ఆన్లైన్లో 'కృత్రిమ మేధ'(ఏఐ) పాఠం చెప్పి.. గిన్నిస్ బుక్లో చోటు సంపాదించాయి. ఎనిమిది ఆపై తరగతులకు చెందిన 13,000 మంది విద్యార్థులు ఇందులో పాల్గొన్నారు.
'అందరూ తెలుసుకోవాలి'..
ఇంటెల్, సీబీఎస్ఈ సంస్థలు సంయుక్తంగా చేపట్టిన యూత్ వర్చువల్ సింపోసియం కార్యక్రమంలో భాగంగా ఈ శిక్షణను నిర్వహించాయి. అక్టోబర్ 13, 14 తేదీల్లో ఈ తరగతులు జరిగాయి.
"రాబోయే రోజుల్లో సాంకేతిక రంగంలో కృత్రిమ మేధ ప్రధాన పాత్ర పోషిస్తుంది. ప్రాథమిక దశలోనే ప్రతి విద్యార్థి.. ఏఐ గురించి తెలుసుకోవాలి. ఈ కార్యక్రమంతో ప్రపంచ రికార్డును సృష్టించిన ఇంటెల్, సీబీఎస్ఈ సంస్థలకు అభినందనలు."
-- బిస్వజిత్ సాహా, సీబీఎస్ఈ ట్రైనింగ్స్ అండ్ స్కిల్ ఎడ్యుకేషన్ డైరెక్టర్.
'వాళ్ల.. ఆసక్తి బయటపడింది'
ఈ శిక్షణా కార్యక్రమంలో విద్యార్థులతో పాటు, ప్రధానోపాధ్యాయులు, ఉపాధ్యాయులూ హాజరయ్యారు. జాతీయ, అంతర్జాతీయ వక్తలు ఇందులో పాల్గొని కృత్రమ మేధకు సంబంధించిన విశేషాలను పంచుకున్నారు.
"సీబీఎస్ఈతో మా కలయిక వల్ల కృత్రిమ మేధ గురించి దేశంలోని ఎంతో మంది విద్యార్థులకు అవగాహన కలిగింది. సీబీఎస్ఈ పాఠశాలల్లో ఏఐ నైపుణ్య ప్రయోగశాలలను ఏర్పాటు చేసేందుకు దోహదం చేసింది. ఈ ప్రపంచ రికార్డుతో నూతన ఆవిష్కరణల పట్ల భారతీయ యువతకు ఉన్న ఆసక్తిని తెలుసుకోగలిగాం. "
--శ్వేత ఖురానా. ఇంటెల్ గ్లోబల్ పార్ట్నర్షిప్స్ అండ్ ఇనిషియేటివ్స్.
ఇదీ చూడండి:రోజంతా శవపేటికలో.. తెరిచి చూస్తే ప్రాణంతో
