అసోంలో ఎన్ఆర్సీ చేపట్టిన కేంద్ర ప్రభుత్వం... దేశవ్యాప్తంగా తెచ్చి తీరతామని స్పష్టం చేసింది. తాజాగా కర్ణాటకలోని భాజపా ప్రభుత్వం రాష్ట్రంలో ఎన్ఆర్సీ చేపడతామని ప్రకటించింది. అక్రమ వలసదారులను గుర్తించేందుకే ఈ నిర్ణయం తీసుకున్నట్లు రాష్ట్ర హోం మంత్రి బసవరాజ్ బొమ్మై తెలిపారు.
"దేశవ్యాప్తంగా ఎన్ఆర్సీ చేపడతారంటూ పెద్ద చర్చ నడుస్తోంది. అందులో కర్ణాటక కూడా ముఖ్యమైన రాష్ట్రం. ఇక్కడకు ఎంతోమంది విదేశీయులు వచ్చి స్థిరపడ్డారు. వారి వల్ల ఎన్నో సమస్యలు ఉన్నాయి. దీనికి సంబంధించిన సమాచారాన్ని సేకరిస్తున్నాం. కేంద్ర హోంమంత్రిని సంప్రదించి ముందుకు వెళ్తాం."
- బసవరాజ్, కర్ణాటక హోంమంత్రి
యావత్ భారత్లో ఎన్ఆర్సీ చేపట్టితీరతామని, అక్రమ వలసదారులను చట్టపరంగా దేశం నుంచి తరిమికొడతామని ఇటీవల కేంద్ర హోంమంత్రి అమిత్ షా స్పష్టంచేశారు.
ఈ నేపథ్యంలో దేశవ్యాప్త ఎన్ఆర్సీ ప్రక్రియపై రెండు చర్చలు జరిగాయని.. కొన్ని రాష్ట్రాలు సుముఖత వ్యక్తం చేశాయని బసవరాజ్ వెల్లడించారు. రాష్ట్రంలో ఎన్ఆర్సీ ప్రక్రియపై వారంలోగా స్పష్టమైన నిర్ణయం తీసుకుంటామన్నారు.
అసోంలో మాత్రమే...
ఇప్పటివరకు అసోంలో మాత్రమే ఎన్ఆర్సీ పూర్తయింది. జాతీయ పౌర రిజస్ట్రీ తుది జాబితాలో 3 కోట్ల 11లక్షల 21 వేల నాలుగు మందికి చోటు లభించింది. సరైన పత్రాలు సమర్పించని కారణంగా 19 లక్షల 6 వేల 657 మందిని జాబితాలో చేర్చలేదు.
- ఇదీ చూడండి: 36గంటలు నిర్విరామంగా అసెంబ్లీ సమావేశం!
