కాంగ్రెస్పై తీవ్రస్థాయిలో ధ్వజమెత్తారు కేంద్రమంత్రి నిర్మలా సీతారామన్. ఉత్తర్ప్రదేశ్ హాథ్రస్లో దళిత యువతి హత్యాచార ఘటనపై స్పందించిన ఆ పార్టీ నేతలు.. పంజాబ్లో ఆరేళ్ల బాలికపై అత్యాచారం జరిగితే ఎందుకు మౌనం వహిస్తున్నారని ప్రశ్నించారు. హాథ్రస్ వెళ్లి బాధిత కుటుంబాన్ని పరామర్శించిన రాహుల్ గాంధీ, ప్రియాంక గాంధీ ఇప్పుడు ఏమైపోయారని నిలదీశారు.
" మన మనసుల్ని కలచివేసే విషయం గురించి మాట్లాడుతున్నా. పంజాబ్ హోషియార్పుర్లో బిహార్కు చెందిన వలస కార్మికుల కుమార్తె, ఆరేళ్ల దళిత బాలికపై అత్యాచారం జరిగింది. శరీరం సగం కాలిపోయింది. ఈ విషయం తెలిశాక కూడా రాహుల్, ప్రియాంక మనస్సాక్షిలో చలనం రావడం లేదా? ఇతర ప్రాంతాల్లో ఇలాంటి ఘటనలు జరిగితే వెెళ్లేవారు ఇప్పుడు ఎందుకు మౌనంగా ఉన్నారు? "
-నిర్మలా సీతారామన్, కేంద్రమంత్రి.
అత్యాచార ఘటనలను రాజకీయం చేయడం తగదని నొక్కి చెప్పారు నిర్మల. హాథ్రస్ ఘటన అనంతరం బాధితురాలి కుటుంబాన్ని రాజకీయ ప్రయోజనాల కోసం పరామర్శించిన రాహుల్, ప్రియాంక.. కాంగ్రెస్ అధికారంలో ఉన్న పంజాబ్, రాజస్థాన్లో అలాంటి ఘటనలు జరిగితే ఎందుకు వెళ్లడం లేదన్నారు.
ఆర్జేడీ నేత, బిహార్లో మహాకూటమి సీఎం అభ్యర్థి తేజస్వీ యాదవ్పైనా సీతారామన్ విమర్శలు గుప్పించారు. బిహార్ వలస కార్మిక కుటుంబానికి అన్యాయం జరిగితే స్పందించరా అని ప్రశ్నించారు.
