ఏదైనా పెద్ద పెద్ద వ్యాపారాల్లో యజమానులు మోసానికి పాల్పడితే వాణిజ్య సుంకాల శాఖ అధికారులు నోటీసులు ఇవ్వడం తెలుసు. కానీ.. కచోరీలు అమ్ముకునే చిరు వ్యాపారికి నోటీసులు ఇవ్వడం ఎప్పుడైనా చూశారా. ఇది నిజం.. ఉత్తర్ప్రదేశ్లోని అలీగఢ్లో 'ముకేశ్ కచోరీ బండార్' అనే చిన్న దుకాణంపై ఇటీవల సోదాలు జరిపారు వాణిజ్య పన్నుల శాఖ అధికారులు. ఆ దుకాణం ద్వారా ముకేశ్ అనే వ్యాపారి ఏడాదికి రూ.60 లక్షలకు పైగా సంపాదిస్తున్నట్లు గుర్తించారు. చిన్న వ్యాపారమే అయినా భారీగా ఆదాయం వస్తున్న కారణంగా ఎలాంటి పన్నులు చెల్లించలేదని, దుకాణాన్ని జీఎస్టీ కింద నమోదు చేసుకోలేదని నోటీసులు జారీ చేశారు. వెంటనే జీఎస్టీ కింద దుకాణాన్ని రిజిస్ట్రేషన్ చేయించి, ఏడాది కాలనికి పన్ను చెల్లించాలని నోటీసుల్లో పేర్కొన్నారు.
"జీఎస్టీ పరిధి ధాటితే సుంకాలు చెల్లించాలి. కానీ కొంతమంది వ్యాపారులు చెల్లించట్లేదు. ఈ కచోరీ కేసు కూడా అలాంటిదే. ఈయన ఆదాయం ఎక్కువే. అయినా సుంకాలు చెల్లించట్లేదు. 7లక్షలకు మించి ఆదాయం వస్తోందని మా ప్రాథమిక దర్యాప్తులో తేలింది. ఆధారాలను పరిశీలించి మరింత విచారణ చేస్తాం "
- ఏకే మహేశ్వరీ, వాణిజ్య సుంకాల అధికారి
తాను 12 ఏళ్లుగా కచోరీ వ్యాపారం చేస్తున్నానని పన్నుల గురించి తెలియదని అంటున్నారు ముకేశ్. తాను రోజుకు రూ.2000 నుంచి రూ.3,000 వరకు సంపాదిస్తానని తెలిపాడు. రూ.40 లక్షల వార్షిక ఆదాయం దాటితే జీఎస్టీ కట్టాలని మోదీ చెప్పారని.. తన ఆదాయం అందులో సగం కూడా ఉండదని అన్నారు ముకేశ్. తనను అధికారులు అనవసరంగా వేధిస్తున్నారని చెప్పుకొచ్చారు.
ఇదీ చూడండి: 'ఏడాదిలో నూతన జాతీయ ఈ-కామర్స్ విధానం'
