ప్రాంతీయ భేదం లేకుండా ప్రతి ఓటర్ను కాంగ్రెస్ పార్టీ గౌరవిస్తుందని ఆ పార్టీ సీనియర్ నేత కపిల్ సిబల్ అన్నారు. ప్రజలను కాంగ్రెస్ విడదీస్తోందని భాజపా అనటం హాస్యాస్పదం అన్నారు. ప్రజల్లో విద్వేషాలు రెచ్చగొట్టి వారిని విడదీయటంలో భాజపా నేతలు నిష్ణాతులని ఆరోపించారు. కేరళలో కాంగ్రెస్ అగ్రనేత రాహుల్ గాంధీ చేసిన ప్రసంగంపై భాజపా నేతలు విమర్శలు చేస్తున్న నేపథ్యంలో సిబల్ ఈ వ్యాఖ్యలు చేశారు.
" కాంగ్రెస్ నేతగా.. దేశంలోని ప్రతి ఓటర్ను నేను గౌరవిస్తాను. వారు ఏ ప్రాంతం వారని సంబంధం లేదు. ఓటు హక్కు ద్వారా ఎన్నికల్లో వారికి నచ్చిన వారిని ఎన్నుకోవచ్చు."
-- కపిల్ సిబల్, కాంగ్రెస్ సీనియర్ నేత
రాహుల్ గాంధీ.. ఏ సందర్భంలో ఈ వ్యాఖ్యలు చేశారో ఆయనే వివరణ ఇవ్వగలరని మరో నేత ఆనంద్ శర్మ తెలిపారు. ఏ ప్రాంతాన్నీ.. కాంగ్రెస్ అగౌరవపరచలేదని స్పష్టం చేశారు. కేరళ తిరువనంతపురంలో మంగళవారం చేసిన ప్రసంగంలో కాంగ్రెస్ అగ్రనేత రాహుల్ గాంధీ.."గత పదిహేనేళ్లుగా ఉత్తర భారతం నుంచే ఎంపీగా ఎన్నికయ్యాను. అక్కడ విభిన్నమైన రాజకీయాలకు అలవాటు పడ్డాను. కానీ కేరళకు వస్తే నా మనసు తేలికవుతుంది. ఇక్కడ ప్రజలు అనవసర అంశాలపై గాక అసలైన సమస్యల గురించి ఆలోచిస్తారు." అని అన్నారు.
ఇదీ చదవండి : ఎన్నికల వేళ.. శశికళ సంధి ప్రతిపాదన
