'హైదరాబాద్​ టు బెంగళూర్' ఏకంగా కంటెయినర్​లోనే - భారీగా గంజాయి తరలిస్తుండగా పట్టివేత

Police Seized Ganga in Satyasai District: పోలీసులు ఎన్ని కఠిన చర్యలు తీసుకుంటున్నా గంజాయి రవాణా ఆగడం లేదు. ఏదో మార్గంలో అక్రమంగా గంజాయి, ఇతర మత్తు పదార్థాలు తరలిస్తున్నారు. ఎన్ని చెక్​పోస్టులు ఏర్పాటు చేసినా  తప్పించుకునే ప్రయత్నం చేస్తున్నారు. కానీ చివరకు ఎక్కడో ఒక చోట పట్టుబడుతున్నారు. తాజాగా గుట్టుచప్పుడు కాకుండా కంటైనర్​లో తరలిస్తున్న గంజాయి ఈరోజు పోలీసులకు చిక్కింది.  

300 kg of Ganja Transported in Container: శ్రీ సత్యసాయి జిల్లా చిలమత్తూరు మండలం కోడికొండ చెక్​పోస్ట్ వద్ద గంజాయి తరలిస్తున్న కంటైనర్​ను పోలీసులు స్వాధీనం చేసుకున్నారు. హైదరాబాద్ నుంచి బెంగళూరు వైపు కంటైనర్​లో గంజాయిని తరలిస్తుండగా పోలీసులు గుర్తించారు. పట్టుబడిన గంజాయి 300 కిలోలు ఉంటుందని పోలీసులు చెబుతున్నారు. కంటైనర్​తో పాటు వాహనంలో ప్రయాణిస్తున్న ఇద్దరు వ్యక్తులను పోలీసులు అదుపులోకి తీసుకున్నారు. పోలీసులు కేసు నమోదు చేసి దర్యాప్తు చేస్తున్నారు. అక్రమంగా రవాణా చేస్తున్న గంజాయి ఎక్కడి నుంచి వచ్చింది, ఎక్కడికి తరలిస్తున్నారు అనే కోణంలో పోలీసులు విచారణ చేస్తున్నారు.