పిల్లల మనో ఉల్లాసానికి.. వేసవి శిక్షణా శిబిరాలు

వేసవి శిబిరాల్లో నచ్చిన అంశాల్లో శిక్షణ పొందుతూ ఆనందంగా గడుపుతున్నారు చిన్నారులు. కడప మున్సిపల్ మైదానంలో జిల్లా క్రీడా సాధికారా సంస్థ ఆధ్వర్యంలో ఉత్సాహంగా సాగే తర్ఫీదుపై ప్రత్యేక కథనం.

కడపలో వేసవి శిక్షణ శిబిరాలు జోరుగా సాగుతున్నాయి. పిల్లలు వివిధ క్రీడల్లో శిక్షణ పొందుతున్నారు. కడప మున్సిపల్ క్రీడా మైదానంలో 21 విభాగాల్లో దాదాపు వెయ్యి మంది ఉత్సాహంగా పాల్గొని కొత్త సంగతులు నేర్చుకుంటున్నారు.

ఉదయం..సాయంత్రం
కడప మున్సిపల్ మైదానంలో జిల్లా క్రీడా సాధికార సంస్థ ఆధ్వర్యంలో ఉదయం 2 గంటలు, సాయంత్రం 2 గంటలు వివిధ క్రీడల్లో తర్ఫీదునిస్తున్నారు. క్రికెట్, కబడ్డీ, థైక్వాండో, హాకీ, వాలీబాల్, బాస్కెట్‌బాల్, బాక్సింగ్, అథ్లెటిక్స్, జిమ్నాస్టిక్స్, ఆర్చరీ, స్విమ్మింగ్, బ్యాడ్మింటన్‌ నేర్పిస్తున్నారు. కడప క్రీడా పాఠశాలకు చెందిన నిపుణులు శిక్షణ ఇస్తున్నారు.

కరాటే, థైక్వాండోపై మహిళలు ఆసక్తి
ఈ వేసవి శిక్షణ శిబిరాలకు విద్యార్థులు ఉత్సాహంగా తరలివస్తున్నారు. బాలికలు ఎక్కువగా ఆత్మరక్షణ కోసం కరాటే, థైక్వాండో నేర్చుకుంటున్నారు.
ఈనెల 31వరకు సాగే వేసవి శిబిరాలను పిల్లలంతా సద్వినియోగం చేసుకోవాలని జిల్లా క్రీడా సాధికార సంస్థ విజ్ఞప్తి చేస్తోంది.