కడప జిల్లాలో పరిషత్ ఎన్నికలు ప్రశాంతంగా ముగిశాయి. మొత్తం 26 మండలాల పరిధిలోని 12 జడ్పీటీసీ, 117 ఎంపీటీసీ స్థానాలకు గురువారం ఉదయం 7 నుంచి సాయంత్రం 5 గంటల వరకు ఎన్నికలు నిర్వహించారు. చివరి గంటలో కొవిడ్‌ బాధితులు, అనుమానితులకు ఓటు వేసే అవకాశం కల్పించారు. పోలింగ్ ముగిసే నాటికి మొత్తం ఓటర్లు 4,79,752 మందికిగానూ 3,05,074 మంది మాత్రమే తమ ఓటుహక్కు వినియోగించుకున్నారు. ఈ లెక్కన కేవలం 63.59 శాతం పోలింగ్ నమోదైంది.
జిల్లాలో నందలూరు మండలంలో అత్యధికంగా 80.61, పోరుమామిళ్లలో అత్యల్పంగా 39.50 శాతం పోలింగ్ నమోదైంది. పరిషత్తు ఎన్నికలను బహిష్కరిస్తున్నట్లు తెదేపా అధినేత నారా చంద్రబాబునాయుడు ప్రకటించడంతో చాలా పోలింగ్ కేంద్రాల్లో కూర్చోవడానికి తెదేపా ఏజెంట్లు ముందుకు రాలేదు. స్థానిక పరిస్థితులను బట్టి కొన్నిచోట్ల తెదేపా అభ్యర్థులు పోటీలో నిలవడంతో ఆయా చోట్ల మాత్రమే పార్టీ ఏజెంట్లు హాజరయ్యారు. అత్యధిక స్థానాలు ఏకగ్రీవం కావడం, ప్రధాన ప్రతిపక్ష పార్టీ ఎన్నికల బహిష్కరించడం, భానుడి భగభగలు, తదితర కారణాలతో చాలా మంది ఓటేయకుండా ఇళ్లకే పరిమితమయ్యారు.
వాగ్వాదాలు...ఆందోళనలు
పరిషత్తు ఎన్నికల సందర్భంగా జిల్లాలో కొన్ని చోట్ల వాగ్వాదాలు, ఆందోళనలు జరిగాయి. ఆ వివరాలు ఇలా ఉన్నాయి.
● బద్వేలు మండలం ఉప్పటివారిపల్లెలోని పోలింగ్ కేంద్రంలోకి తెదేపా ఏజెంట్లను అనుమతించకపోవడంపై ఆ పార్టీ జడ్పీటీసీ అభ్యర్థి బీరం శిరీష ఆందోళనకు దిగారు. అక్కడే నేలపై కూర్చుని ఆమె నిరసన తెలిపారు. అనంతరం అధికారులు స్పందించి పోలింగ్ కేంద్రంలో తెదేపా ఏజెంట్లను కూర్చోనివ్వడంతో ఆమె ఆందోళన విరమించారు.
● రైల్వేకోడూరు మండలం మైసూరివారిపల్లెలో పోలింగ్ అధికారులు తమతో నిర్లక్ష్యంగా మాట్లాడారని ఆరోపిస్తూ కొంతమంది ఓటేయకుండానే వెనక్కి వెళ్లిపోయారు. ఈ క్రమంలో జనసేన, వైకాపా వర్గాల మధ్య వాగ్వాదం చోటుచేసుకుంది. పోలీసులు ఇరువర్గాలకు సర్దిచెప్పి పంపించేశారు.
● కమలాపురం మండలం దేవరాజుపల్లె, వల్లూరు మండలం పెద్దపుత్త, మాచిరెడ్డిపల్లె ఎంపీటీసీ స్థానాల్లో తెదేపా ఎన్నికలను బహిష్కరించడంతో చాలా తక్కువమంది మాత్రమే ఓటుహక్కును వినియోగించుకున్నారు.
● కమలాపురం మండలం రామాపురంలో తెదేపా రాష్ట్ర కార్యదర్శి సాయినాథ్‌శర్మను పోలీసులు గృహనిర్బంధంలో ఉంచారు. ఎన్నికల్లో పోలీసులు, అధికారులు ఏకపక్షంగా వ్యవహరించారని ఆయన ఆరోపించారు.
● చాపాడు మండలం అయ్యవారిపల్లెలోని ఓ పోలింగ్ కేంద్రంలో ఒక వృద్ధురాలి ఓటు విషయమై అనుమానంతో అధికారి వద్ద నుంచి బ్యాలెట్‌ పత్రాన్ని లాక్కొని తెదేపా ఎంపీటీసీ అభ్యర్థి రాజేశ్వరీ బయటికివెళ్లారు. ఈ కారణంగా పోలీసులు రాజేశ్వరిపై కేసు నమోదు చేశారు. అంతకుముందు ఉదయం పోలింగ్ కేంద్రంలోకి తెదేపా ఏజెంట్‌ను అనుమతించకపోవడంపై రాజేశ్వరి ఆందోళనకు దిగారు.
● రాజుపాళెం మండలం వాసుదేవపురంలో వైకాపా నాయకుడు నారాయణరెడ్డి కారుపై గుర్తుతెలియని వ్యక్తులు రాళ్లతో దాడిచేశారు. దీనిపై బాధితుడు పోలీసు కేసు నమోదు చేయించలేదు.
● ప్రొద్దుటూరు మండలంలోని ఏడు ఎంపీటీసీ స్థానాల్లో తెదేపా ఎన్నికల బహిష్కరణ కారణంగా పోలింగ్ కేంద్రాల్లో ఆ పార్టీ తరఫున కూర్చునేందుకు ఏజెంట్లు ముందుకురాలేదు.
● రాజంపేట మండలం ఎగువబసినాయుడుగారిపల్లెలో భాజపా నాయకుడు రమేష్‌నాయుడు, స్థానిక ఎస్‌.ఐ. రోషన్‌ మధ్య స్వల్ప వాగ్వాదం జరిగింది. బోయనపల్లెలో వైకాపా, తెదేపా, కొన్లోపల్లిలో వైకాపా, జనసేన వర్గాల మధ్య స్వల్ప వాగ్వాదాలు జరిగాయి.
ఇదీ చదవండీ.. ఉక్కును కాపాడుకోవడానికి.. తెదేపా కార్పొరేటర్ల పాదయాత్ర
