Jagananna Colony Problems: ముఖ్యమంత్రి సొంత నియోజకవర్గంలోనే జగనన్న కాలనీలో ఇళ్ల నిర్మాణానికి లబ్ధిదారులు అష్టకష్టాలు పడుతున్నారు. పులివెందుల నియోజకవర్గంలోని వేంపల్లి మండలం రాజీవ్‌కాలనీ సమీపంలోని గుట్టపై జగనన్న కాలనీ కోసం లేఔట్ వేసి పేదలకు పట్టాలిచ్చారు. తొలుత ప్రభుత్వమే ఇళ్లు నిర్మించి ఇస్తుందని హామీ ఇచ్చినా.. ఆ తర్వాత లబ్ధిదారులే కట్టుకోవాలంటూ చేతులెత్తిసింది. ఇళ్ల నిర్మాణం చేపట్టాలంటూ వాలంటీర్లు ఒత్తిడి తీసుకురావడంతో...అప్పులు చేసి మరీ ఇళ్లు సగం మేర ఇళ్లు నిర్మించారు.
గుట్టపైకి సరైన రహదారులు నిర్మించకపోవడంతో లబ్ధిదారులు తీవ్ర ఇబ్బందులుపడుతున్నారు. గుట్టపైకి నిర్మాణ సామగ్రి తీసుకురావడానికి వాహనాలేవీ రావడం లేదని వాపోతున్నారు. ఇటీవల కురిసిన వర్షాలకు రహదారి మరింత అధ్వానంగా తయారైంది. పనులు చేసేందుకు మేస్త్రీలు, కూలీలు ముందుకు రాకపోవడంతో 4 రోజులుగా పనులు నిలిపివేశారు. గుట్టపైకి వెళ్లేందుకు దారి సరిగా లేకపోవడంతో....ఇసుక, నీటికి అదనపు ఛార్జీలు వసూలు చేస్తున్నారు. ట్రాక్టర్ ఇసుకకు 2 వేల500, ట్యాంకర్ నీటికి 1500 రూపాయలు పెట్టి కొనుగోలు చేయాల్సి వస్తోందని లబ్ధిదారులు వాపోతున్నారు. ఊరికి దూరంగా ఉన్న ఈ కాలనీకి రావాలంటే ఆటోలకి రెండింతల ఛార్జీలు చెల్లించాల్సి వస్తోందన్నారు.
మరోవైపు గుట్టపై వైకాపా నాయకులు మట్టి తవ్వి విక్రయించుకుంటండటంతో....ఆ ప్రాంతం మొత్తం గుంతల మయంగా మారిపోయిందని చెబుతున్నారు. నిర్మాణ సామాగ్రి తరలించే వాహనాలు సైతం గుంతల్లోపడి బోల్తాపడుతున్నాయి. ఇటీవల ఓ ట్యాంకర్ బోల్తాపడి మహిళ మృతిచెందింది. ముఖ్యమంత్రి సొంత నియోజకవర్గంలోనే జగనన్న కాలనీల్లో మౌలిక సదుపాయాలు లేవని లబ్ధిదారులు ఆగ్రహం వ్యక్తం చేస్తున్నారు. జగనన్న కాలనీకి వెళ్లే రహదారిని బాగు చేయాలని నాయకులకు విన్నవించిన పట్టించుకోవడంలేదని లబ్ధిదారులు వాపోతున్నారు.
'గుట్టపైకి వెళ్లేందుకు దారి సరిగా లేకపోవడంతో ఇబ్బందులు ఎదురవుతున్నాయి. ఇటీవల కురిసిన వర్షాలకు రహదారి మరింత అధ్వానంగా తయారైంది. ఇసుక, నీటికి అదనపు ఛార్జీలు వసూలు చేస్తున్నారు. ట్రాక్టర్ ఇసుకకు 2 వేల500, ట్యాంకర్ నీటికి 1500 రూపాయలు పెట్టి కొనుగోలు చేయాల్సి వస్తోంది. ఊరికి దూరంగా ఉన్న ఈ కాలనీకి రావాలంటే ఆటోలకి రెండింతల ఛార్జీలు చెల్లించాల్సి వస్తోందన్నారు. నాయకులు పట్టించుకోవడంలేదు. కరెంట్ పనులు చేయమంటే అధికారులు డబ్బులు అడుగుతున్నారు.'-నారాయణ లబ్ధిదారుడు
ఇవీ చదవండి:
