కడప జిల్లా విభరాపురంలో శనివారం ట్రాక్టరు చక్రం కింద నలిగిపోయి మూడోతరగతి చదువుతున్న బాలుడు అఫ్రిది (8) అక్కడికక్కడే మృతిచెందాడు. నిన్న ఉదయం ఇంటి నుంచి బాలుడు సైకిల్‌ తొక్కుకుంటూ బయటకు వచ్చాడు. ఇంతలో వేగంగా వెనుక వైపునకు వచ్చిన ట్రాక్టరు సైకిల్‌ను ఢీకొనడంతో వెనుక వైపు చక్రం కింద పడి తల నుజ్జయిపోవడంతో అక్కడికక్కడే ప్రాణాలు విడిచాడు. ఖాదర్‌హుస్సేన్‌ , నూర్జహాన్‌ దంపతుల కుమారుడు అఫ్రిది. వీరికి కుమార్తె ఆలియా (6) కూడా ఉంది. ఉదయం సైకిల్‌ తొక్కే అలవాటున్న బాలుడు రోడ్డుపైకి సైకిల్‌పై వెళ్లడంతో వేగంగా వెనక్కి వస్తున్న ట్రాక్టరు ఢీకొనడంతో ప్రమాదం జరిగింది.
*కళ్లెదుటే ఒక్కొగానొక్క కొడుకు కానరాని లోకాలకు వెళ్లిపోవడంతో మాతృమూర్తి ఖిన్నురాలైంది.. ఉపాధి నిమిత్తం పొరుగు జిల్లాలో ఉంటున్న కన్నతండ్రి దిగ్భ్రాంతికి లోనయ్యాడు. గుడ్‌నైట్‌ చెప్పిన తన భయ్యా తాను నిద్ర లేచేలోపే ఇక లేడని.. తిరిగిరాడని తెలిసి ఆ చెల్లెలు గుండెలవిసేలా విలపించింది. కమలాపురం మండలంలో జరిగిన ఈ ప్రమాదం తీవ్ర విషాదాన్ని నింపింది.
అసలేం జరిగిందంటే
ఖాదర్‌హుస్సేన్‌, నూర్జహాన్‌ దంపతులుండే వీధిలోకి ఓ ఖాళీ ట్రాక్టరు వచ్చింది. ఓ ఇంట్లోని సిమెంటు బస్తాలను లోడ్‌ చేసుకోవాలని చోదకుడు ట్రాక్టరును వెనక్కి(రివర్స్‌) తిప్పాడు. అదే సమయంలో అఫ్రిది తన ఇంటి నుంచి సైకిల్‌పై వీధిలోకి వస్తున్నాడు. ట్రాక్టరు చోదకుడు వెనుక నుంచి వస్తున్న బాలుడిని గమనించకుండా వాహనాన్ని రివర్స్‌ చేశాడు. హఠాత్పరిణామంతో బాలుడు సైకిల్‌తోసహా ట్రాక్టర్‌ చక్రాల కింద పడిపోయాడు. చక్రం తలపై వెళ్లడంతో తీవ్ర రక్తస్రావమై ఘటనాస్థలంలోనే కన్నుమూశాడు. మృతదేహాన్ని పంచనామా నిమిత్తం కడప సర్వజన ఆసుపత్రికి తరలించారు. అనంతరం ట్రాక్టరును స్వాధీనం చేసుకుని పోలీస్‌స్టేషన్‌కు తరలించారు. బాలుడి మృతికి కారణమైన చోదకుడిని పోలీసులు అదుపులోకి తీసుకుని విచారిస్తున్నారు.
ఇదీ చదవండీ...
