తణుకు మాజీ ఎమ్మెల్యే ఇంటి వద్ద ఉద్రిక్తత

పశ్చిమ గోదావరి జిల్లా తణుకు మాజీ శాసనసభ్యుడు అరిమిల్లి రాధాకృష్ణ ఇంటి వద్ద ఉద్రిక్తత పరిస్థితి నెలకొంది. అమరావతి పరిరక్షణ ఐక్య సంఘాల వేదిక పిలుపు మేరకు అసెంబ్లీ ముట్టడికి వెళ్తున్న ఆయనను పోలీసులు అడ్డుకున్నారు. అసెంబ్లీకి వెళ్లేందుకు పెద్ద ఎత్తున కార్యకర్తలు తరలి వచ్చారు.

అసెంబ్లీ ముట్టడికి తరలి వెళ్ళేందుకు నియోజకవర్గం నుంచి నాయకులు కార్యకర్తలు తణుకు మాజీ శాసనసభ్యులు ఆరిమిల్లి ఇంటికి తరలివచ్చారు. ఇంటి నుంచి బయలుదేరుతున్న సమయంలో పోలీసులు వారిని అడ్డుకున్నారు. పోలీసులను దాటుకుని ముందుకు వెళ్లే ప్రయత్నంలో ఇరువర్గాల మధ్య తోపులాట చోటు చేసుకుంది. పోలీసుల వైఖరిని నిరసిస్తూ రోడ్డుపై రాధాకృష్ణ ఆయన అనుచరులు బైఠాయించారు. పోలీసులకు, ముఖ్యమంత్రికి వ్యతిరేకంగా నినాదాలు చేశారు. ఒక రాష్ట్రానికి ఒకే రాజధాని అన్న విధానాన్ని జగన్మోహన్ రెడ్డి అమలు చేయాలని వారు డిమాండ్ చేశారు.

ఇవీ చూడండి...