పశ్చిమ గోదావరి జిల్లా ఉంగుటూరు మండలం చేబ్రోలు జాతీయ రహదారి 216-ఏ పై జరిగిన ప్రమాదంలో ఓ వ్యక్తి అక్కడికక్కడే ప్రాణాలు కోల్పోగా..మరో వ్యక్తికి స్వల్ప గాయాలయ్యాయి. ద్విచక్ర వాహనంపై వెళ్తున్న వీరిని గుర్తు తెలియని లారీ ఢీకొట్టి వెళ్లిపోయింది. వీరు తెలంగాణలోని మహబూబ్నగర్ జిల్లా చెర్ల ఇటిక్యాలకు చెందిన వారిగా పోలీసులు గుర్తించారు.
లారీలో చేపల మేత (తవుడు) వేసుకుని ఉంగుటూరు మండలం రాచూరుకు వచ్చారు. లారీని చెరువు దగ్గర నిలిపి భోజనానికి ద్విచక్ర వాహనంపై నారాయణపురం మీదుగా చేబ్రోలు బయల్దేరారు. ఈ సమయంలో అదే మార్గంలో వెళుతున్న లారీ వీరు ప్రయాణిస్తున్న ద్విచక్రవాహనాన్ని ఢీకొట్టి వెళ్లిపోయింది. ఈ ప్రమాదంలో లారీ డ్రైవర్ స్వామి అక్కడికక్కడే మృతి చెందాడు. క్లీనర్ మంతటి రామస్వామికి స్వల్ప గాయాలయ్యాయి. కేసు నమోదు చేసుకున్న చేబ్రోలు పోలీసులు దర్యాప్తు చేస్తున్నారు.
