పాలకొల్లు ఎమ్మెల్యే నిమ్మల రామానాయుడు ప్రయాణిస్తున్న బోటు వశిష్ట గోదావరి వరదలో మొరాయించి.. మధ్యలో ఆగిపోయింది. ఎట్టకేలకు సారంగి చాకచక్యంతో బోటును చెట్టు వరకు తీసుకెళ్లి లంగర్ వేశారు. తూర్పు గోదావరి జిల్లా రాజోలు మండలం రామరాజు లంక వద్ద గోదావరి మధ్యలో ఎమ్మెల్యే ప్రయాణిస్తున్న బోటు ఆగిపోయింది. గోదావరిలో వరద ఉద్ధృతి అధికంగా ఉండడంతో బోటు ఆగినట్లు తెలుస్తోంది. బోటును సమీప చెట్ల వరకు నడిపించి సారంగి లంగర్ వేశారు. ఎమ్మెల్యేతో పాటు లంక గ్రామస్థులు పలువురు బోటులో ఉండిపోయారు.
గోదావరి వరద ఉద్ధృతంగా ఉండడంతో బోటులో ఉన్నవారు భయాందోళన వ్యక్తం చేశారు. ఎమ్మెల్యేను తీసుకొచ్చేందుకు చిన్నబోటును పంపేందుకు అధికారులు ప్రయత్నించారు. వరద అధికంగా ఉండడంతో చిన్న బోటు వెళ్లలేకపోయింది. దీంతో పర్యాటక బోటును పంపి నిమ్మల రామానాయుడిని క్షేమంగా ఒడ్డుకు చేర్చారు అధికారులు.
రామానాయుడు చిక్కుకుపోవడంపై చంద్రబాబు ఆరా
గోదావరి వరదల్లో తెదేపా ఎమ్మెల్యే నిమ్మల రామానాయుడు చిక్కుకోవడంపై ఆ పార్టీ అధినేత చంద్రబాబు ఆందోళన వ్యక్తం చేశారు. హుటాహుటిన పశ్చిమ గోదావరి జిల్లా కలెక్టర్ కు చంద్రబాబు ఫోన్ చేసి సమాచారం తెలుసుకున్నారు. ఎమ్మెల్యే రామానాయుడుతో సహా వరదల్లో చిక్కుకున్న వారిని కాపాడాలని చంద్రబాబు కోరారు.
లోకేశ్ ఆందోళన
గోదావరి వరదల్లో ఎమ్మెల్యే నిమ్మల చిక్కుకోవడంపై లోకేశ్ ఆందోళన వ్యక్తం చేశారు. పశ్చిమగోదావరి జిల్లా కలెక్టర్‌కు ఫోన్ చేసి వివరాలు అడిగి తెలుసుకున్నారు. ఎమ్మెల్యే రామానాయుడు యోగ క్షేమాలు అడిగి తెలుసుకున్నారు.
ఇదీ చదవండి:
