విశాఖ జిల్లా రోలుగుంట మండలంలో ఖరీఫ్ సీజన్ విత్తన విక్రయాలు స్థానిక పీఎసీఎస్లో ప్రారంభించారు. అమ్మకాలు పద్ధతి ప్రకారం లేకపోవటంతో రైతులు ఆందోళన చెందుతున్నారు. ప్రధానంగా బయోమెట్రిక్ విధానం మొబైల్ నెంబర్ నమోదు విధానం అవస్థలకు గురి చేస్తున్నాయి. దీనికితోడు తక్కువ విత్తనాలు రావడంతో వీటిని సకాలంలో పొందటానికి రైతులు ఎగబడుతున్నారు. ప్రధానంగా ఆర్జీఎల్ వంటి రకాలకు రైతుల ప్రాధాన్యం ఇవ్వడంతో అవి దొరకడం కష్టం అవుతుంది. మండలానికి సంబంధించి 21 పంచాయతీల రైతులకు ఒకేసారి విక్రయాలు ప్రారంభించడంతో తోపులాట జరుగుతోంది. కొనుగోలుదారులు అంతా ఒకేసారి నిర్వాహకులపై ఒత్తిడి తేవడంతో పోలీసులు, రెవెన్యూ అధికారులు రంగంలోకి దిగి వారిని అదుపు చేయాల్సి వస్తోంది. విత్తనాలను పొందేందుకు అన్ని ప్రాంతాల నుంచి రైతులు, మహిళలు నిరీక్షిస్తున్నా.. అప్పటికీ సకాలంలో వారికి దొరకడం లేదని ఆవేదన చెందుతున్నారు. అధికారులపై మండి పడుతున్నారు. వర్షాలు కురిసే అవకాశం ఉండటంతో సమయానికి విత్తనాలు వేయగలమో.. లేదోనని రైతులు మదన పడుతున్నారు. రోలుగుంట మండలానికి సంబంధించి ఆర్జీఎల్ రకంతో పాటు సోనా మసూరి, సాంబ మసూరి, తరంగిణి, స్వర్ణ, శ్రీకాకుళం సన్నాలు తదితర రకాలు ప్రకటించినప్పటికీ ఈ ప్రాంత రైతులు అంతా కేవలం ఆర్జీఎల్ మీదే మక్కువ చూపిస్తున్నారు.
ఇది కూడా చదవండి.
