టమాటా రైతుకు కన్నీరే మిగులుతోంది. కనీసం కోత ఖర్చులూ రాకపోవడంతో టమాటా రైతులు ఆవేదన వ్యక్తం చేస్తున్నారు. ప్రైవేటు మార్కెట్లు, మాల్స్‌లో కిలో రూ.30 పలుకుతున్నా.. రైతు వద్దకు వచ్చే సరికి రూ.5కూడా పడటం లేదని విచారం వ్యక్తం చేస్తున్నారు. విశాఖ జిల్లా దేవరాపల్లి మండలంలోని పలు ప్రాంతాల్లో రైతులు టమోటా పంట సాగుచేస్తారు. ఈ ప్రాంతంలో పండించిన పంటను దేవరాపల్లి రోజువారి హోల్ సేల్ మార్కెట్లో విక్రయిస్తారు. ఒకేసారి టమాటా కోతకు రావడంతో మార్కెట్లో ధరలు పతనమయ్యాయి.
ఇక్కడ వ్యాపారులు సిండికేట్గా మారి రైతుల నుంచి తక్కువ ధరకు కొనుగోలు చేస్తున్నారు. కిలోకి రూ.5 మించి రావట్లేదని రైతులు ఆందోళన వ్యక్తం చేస్తున్నారు. దళారీ వ్యవస్థ నుంచి రైతులను కాపాడి.. ప్రభుత్వం మద్ధతు ధర కల్పించాలని కోరుతున్నారు. కూరగాయలు నిల్వ చేసుకునేందుకు శీతల గిడ్డంగులు ఏర్పాటు చేయాలని రైతులు విజ్ఞప్తి చేస్తున్నారు.
ఇదీ చదవండి: నేడు ఓర్వకల్లు విమానాశ్రయాన్ని ప్రారంభించనున్న సీఎం జగన్
