విశాఖ ఉక్కు పరిశ్రమ ప్రైవేటీకరణ విషయంలో రాష్ట్ర ప్రభుత్వం దోబూచులాడుతోందని తెదేపా పొలిట్ బ్యూరో సభ్యులు కొల్లు రవీంద్ర దుయ్యబట్టారు. అసెంబ్లీలో తీర్మానం చేశామని, కేంద్రాన్ని ప్రశ్నించకుండా ప్రజలను మోసం చేస్తోందన్నారు. విశాఖ ఉక్కు అనుబంధ సంస్థలను సైతం ప్రైవేటీకరించేందుకు కేంద్రం నోటిఫికేషన్ విడుదల చేయటం దారుణమన్నారు.
ప్రత్యేక హోదా, విభజన హామీలు అమలు చేయని కేంద్ర ప్రభుత్వం ఏపీలో ఉన్న పరిశ్రమలను మాత్రం ప్రైవేటీకరణ చేస్తోందని కొల్లు రవీంద్ర విమర్శించారు. అసెంబ్లీలో తీర్మానం చేశామని చేతులు దులుపుకోకుండా వైకాపా ఎంపీలు పార్లమెంట్లో పోరాటం చేయాలని హితవు పలికారు. రాష్ట్రానికి ఇంత అన్యాయం జరుగుతుంటే ముఖ్యమంత్రి ఎందుకు మాట్లాడటం లేదని ప్రశ్నించారు. విశాఖ ఉక్కు కోసం ఎంతోమంది ప్రాణాలు అర్పించారని తెలిపారు. విశాఖ ఉక్కు ఆంధ్రుల హక్కు అన్న కొల్లు రవీంద్ర.. స్టీల్ ప్లాంట్ను కాపాడుకునేందుకు తెదేపా పోరాటానికి సిద్ధంగా ఉందని స్పష్టం చేశారు.
ఇదీ చదవండి:
STEEL PLANT: విశాఖ ఉక్కు ప్రైవేటీకరణకు కేంద్రం అడుగులు.. పెరుగుతున్న ఆందోళనలు
