విశాఖ జిల్లా దేవరాపల్లి వద్ద శారదా నదిపై అసంపూర్తిగా ఉన్న వంతెనను రూ.41 లక్షలతో పూర్తి చేయనున్నట్లు ఆర్అండ్బీ ఎస్ఈ కేశవరావు స్పష్టం చేశారు. ఇటీవల కురిసిన వర్షాలకు రైవాడ జలాశయం నుంచి శారదా నదిలోకి నీరు వదలటంతో నది కాజ్వే పూర్తిగా కొట్టుకుపోయింది. దీంతో అనంతగిరి, హకుంపేట మండలాలకు చెందిన దాదాపు 100 గిరిజన గ్రామాలకు రాకపోకలు నిలిచిపోయాయి. ప్రజల ఇబ్బందులపై ఈటీవీ-ఈటీవీ భారత్లో ప్రచురితమైన కథనాలకు స్థానిక ఎమ్మెల్యే ముత్యాలనాయుడు స్పందించారు. కాజ్వే అసంపూర్తి వంతెనను నాలుగు రోజుల క్రితం అధికారులతో కలిసి పరిశీలించారు.
తాజాగా అర్అండ్బీ ఎస్ఈ కేశవరావు కాజ్ వే ను పరిశీలించి...అసంపూర్తిగా ఉన్న వంతెనను పూర్తిచేయనున్నట్లు తెలిపారు. ఈ పనులను త్వరలోనే ప్రారంభిస్తామని వెల్లడించారు.
