ఉపాధ్యాయుల బదిలీలకు సంబంధించిన ప్రక్రియ వెబ్ ఆప్షన్ల ద్వారానే చేపట్టాలని ప్రభుత్వం నిర్ణయించింది. 13 జిల్లాల నుంచి వేల మంది టీచర్లు బదిలీలకు దరఖాస్తు చేయడంతో వారంతా ఆప్షన్ల కోసం ఆన్లైన్లో లాగిన్ కావాల్సిన పరిస్థితి నెలకొంది. అందుకు అనుగుణంగా పాఠశాల విద్యాశాఖ సర్వర్ను సిద్ధం చేయలేదని ఉపాధ్యాయులు ప్రధానంగా ఆరోపిస్తున్నారు. సర్వర్లో వచ్చే సమస్యలు పరిష్కరించాలని పదేపదే కోరినప్పటికీ పట్టించుకోవడం లేదని చెబుతున్నారు. 2015 లో వెబ్ ఆప్షన్ల ద్వారా బదిలీలు చేసినప్పుడు ఎటువంటి సమస్యలు రాలేదని ఇప్పుడు ఎందుకు వచ్చిందో చెప్పాలని నిలదీస్తున్నారు.
విశాఖ జిల్లాకు సంబంధించి 3263 ఖాళీలకు 5000 మందికి పైగా టీచర్లు దరఖాస్తులు చేశారు. వీరిలో 98 శాతం వరకు వెబ్ ఆప్షన్లు నమోదు చేశారు. మిగిలిన వారికి మరో అవకాశం ఇచ్చారు. ఇటువంటి వారు ఈ నెల 21, 22 తేదీలలో సంబంధిత మండల విద్యాశాఖ అధికారులు కార్యాలయాలకు వెళ్లి ఆప్షన్ ఇచ్చుకోవచ్చు. ఏవైనా సాంకేతిక సమస్యలు తలెత్తితే ఈ నెల 23 నుంచి 31వ తేదీ వరకు సంబంధిత మండల విద్యాశాఖ అధికారి కార్యాలయానికి వెళ్లి మార్పులు, చేర్పులు చేసుకోవచ్చని విద్యాశాఖ చెబుతోంది. రోజుకి పది మంది టీచర్లకు మాత్రమే మార్పులు, చేర్పులకు అవకాశముండగా... ఎంఈవో కార్యాలయాల్లో ప్రత్యేక కౌంటర్ల ఏర్పాటుకు విద్యాశాఖ ఆదేశించింది. డీటీపీ ఆపరేటర్లు, ఎంఐఎస్ కోఆర్డినేటర్లు మాత్రమే ఈ ప్రక్రియ చేపట్టాలని విద్యాశాఖ స్పష్టం చేసింది.
ఇదీ చదవండి:
విశాఖ పోర్టు ట్రస్ట్ కొత్త డిప్యూటీ చైర్మన్గా దుర్గేష్ కుమార్ దూబే
