ఉద్యోగ నియామకాల కౌన్సెలింగ్లో అవకతవకలు జరగడం వల్ల ఆ ప్రక్రియను తిరిగి నిర్వహించాలంటూ.. మిడిల్ లెవెల్ హెల్త్ ప్రొవైడర్ రెండవ బ్యాచ్ సిబ్బంది నిరసనకు దిగారు. విశాఖపట్నం జిల్లా వైద్య, ఆరోగ్యశాఖ కార్యాలయం ఎదుట ధర్నా చేపట్టారు. మెరిట్ ర్యాంకులు సాధించినప్పటికీ... తాము నష్టపోయామని ఆవేదన వ్యక్తం చేశారు.
అసలేం జరిగింది ?
ఐదువేల జనాభా ప్రాతిపదికన హెల్త్, వెల్నెస్ కేంద్రాలలో మెరుగైన వైద్యం అందించేందుకు.. ప్రభుత్వం ఒప్పంద పద్ధతిలో మిడిల్ లెవెల్ హెల్త్ ప్రొవైడర్ పోస్టుల భర్తీకి నోటిఫికేషన్ విడుదల చేసింది. 2018లో అధికారులు పరీక్ష నిర్వహించి నియామకాలు చేపట్టారు. ఈ ప్రక్రియ పూర్తిగా జోనల్ ప్రకారం జరుగుతుందని నోటిఫికేషన్లో పేర్కొన్నారు. మొత్తం 1,400 పోస్టుల భర్తీకి ఒకేసారి కౌన్సిలింగ్ నిర్వహించడం సాధ్యం కాక మూడు బ్యాచ్లుగా విభజించారని సిబ్బంది తెలిపారు.
మొదటిసారి మభ్యపెట్టారు...
మొదటి బ్యాచ్ వారికి పోస్టింగ్ ఇచ్చినా.. నిబందనలకు విరుద్ధంగా రెండో విడత కౌన్సిలింగ్కూ అనుమతించారు. ఈ విధంగా వారికి స్థానిక ప్రదేశాల్లో ఉద్యోగం ఇచ్చారు. ఈ విషయంపై రెండోబ్యాచ్ సిబ్బంది అభ్యంతరం తెలపగా.. వారికీ ఇలాంటి అవకాశమే కల్పిస్తామని గుంటూరు రీజనల్ మెడికల్ డైరెక్టర్ మభ్య పెట్టారని బాధితులు పేర్కొన్నారు.
రెండోసారీ మొండిచేయి:
కరోనా వల్ల లాక్‌డౌన్‌ అమలులో ఉన్నందున మూడో బ్యాచ్ సిబ్బందికి.. వారి ఆధార్ కార్డులో ఉన్న చిరునామాకు 50 కిలోమీటర్ల దూరంలోనే ఉద్యోగాలు ఇచ్చారు. తమను మాత్రం వందల కిలోమీటర్ల దూరంలో నియమించారని నిరసనకారులు మండిపడ్డారు. ప్రతిభ ఉన్నా కౌన్సెలింగ్లో అన్యాయం జరిగి.. కుటుంబ సభ్యులకు దూరమై ఆందోళనకు గురవుతున్నామని వాపోయారు. సీఎం జగన్ ఏర్పాటు చేయనున్న 'విలేజ్ క్లినిక్'లోనైనా.. ఏ జోన్ అభ్యర్థులకు ఆ జోన్లలోనే పోస్టింగ్ ఇచ్చి న్యాయం చేయాలని విజ్ఞప్తి చేశారు.
ఇదీ చదవండి:
