కుళాయిల కోసం పార్టీల మధ్య విభేదాలు
శ్రీకాకుళం జిల్లా బూర్జ మండలంలో రెండు పార్టీల మధ్య పోరు గ్రామస్థులకు తాగునీరు లేకుండా చేసింది. తెదేపా ప్రభుత్వ హయంతో చీడివలస పంచాయితీ గంగంపేట గ్రామానికి తాగు నీరందించేందుకు 2017లో పదకొండు వీధి కుళాయిలు ఏర్పాటు చేశారు. వీటికి అదనంగా అదే ఏడాది మరో 4 కుళాయిల ఏర్పాటుకు పంచాయితీ అధికారులు తీర్మానించారు. ఈ సంవత్సరం జూలై చివరి వారంలో అధికార పార్టీ ఆధ్వర్యంలో 5 కుళాయిల ఏర్పాటుకు పనులు చేపట్టారు. దీంతో ఇరు పార్టీల మధ్య విభేదాలు బయటపడ్డాయి. ఇవి కాస్త ముదరడంతో గత 2 నెలలుగా గ్రామానికి తాగునీటి సరఫరా నిలిచిపోయింది. ఈ నేపథ్యంలో ఎంపీడీవో సురేష్‌ కుమార్‌ ఆధ్వర్యంలో గతంలో ఏర్పాటు చేసిన 4 కుళాయిలను పోలీసుల సాయంతో మూసివేత పనులు చేపట్టారు. దీంతో గ్రామంలో ఉద్రిక్త పరిస్థితులు చోటుచేసుకున్నాయి.
