ప్రకాశం జిల్లా ఒంగోలుకు చెందిన గుమ్మల ప్రశాంత్, రాధాల ఒక్కగానొక్క కుమారుడు. అతనికి పానీపూరి అంటే చాలా ఇష్టం. సాయంత్రం వీధుల్లో విక్రయించే పానీపూరి బండి వద్ద తినిపించేవారు. అయితే లాక్డౌన్ సమయంలో ఆ బండ్లు మూతపడ్డాయి. తరువాత కొన్నాళ్ల తర్వత అవి తెరిచినా శుభ్రత లేక తినడానికి భయం వేసేది. పానీపూరి కావాలని కుమారుడు తరుచూ పేచీ పెట్టడం, పరిశుభ్రమైంది లభించకా.. కుమారుడి కోరిక తీర్చలేకపోవడం బాధపడేవారు.
ఉద్యోగాలు వదిలేసి మరీ..
ప్రశాంత్.. ఎం ఫార్మసీ పూర్తి చేసి ఓ ప్రైవేటు ఇంజినీరింగ్ కళాశాలలో పని చేసేవారు. భార్య రాధ కూడా ఉన్నత విద్యను అభ్యసించారు. కుమారుడి కోరికను తీర్చాలనే ఉద్దేశ్యంతో ఆ తల్లిదండ్రులు.. ఉద్యోగాలను వదిలేసి వ్యాపారం వైపు దృష్టి సారించారు. పరిశుభ్రమైన వాతావరణంలో పానీ పూరి చేసి ప్రజలకు అందిస్తే ప్రజలు ఆరోగ్యం కాపాడే అవకాశం వస్తుందని భావించి చాట్, పానీపూరి పాయింట్ను ఏర్పాటు చేశారు. వంటలో నాణ్యత ప్రమాణాలు పాటించడం, వ్యాపార మెళకువలు కోసం ప్రశాంత్ పూణే వెళ్లి అధ్యయనం చేశారు. ఇప్పడు ఒంగోలు ట్రంక్ రోడ్లో నాణ్యమైన, పరిశుభ్రమైన స్నాక్స్ కేంద్రంగా ప్రాచుర్యంలోకి వచ్చింది.
ప్రస్తుతం పానీపూరితో పాటు చాట్ మసాలా, పిజ్జా, బర్గర్లు, వంటి తయారు చేసి విక్రయిస్తారు. ఇటీవల కాలంలో వినియోగదారుడు ఆరోగ్యం పట్ల చూపిస్తున్న శ్రద్ధ కూడా తమ వ్యాపారానికి అనుకూలంగా మార్చుకున్నారు. వీటి తయారీకి బీహార్, గుజరాత్ నుంచి నిపుణులను తీసుకువచ్చారు. నాణ్యమైన, రుచికరమై స్నాక్స్ ఒంగోలు వంటి పట్టణంలో లభించడం ఆనందంగా ఉందని పలువురు అభిప్రాయం వ్యక్తం చేస్తున్నారు. ప్రజల అవసరాలను గుర్తించి దాన్నే ఆదాయమార్గంగా మలుచుకున్న ఆ దంపతులు.. వ్యాపారం చేయాలనుకునే పలువురికి ఆదర్శంగా నిలుస్తున్నారు.
