CROP LOSS DUE TO MANDOUS : కృష్ణా జిల్లా ఉంగుటూరు మండలం మానికొండలో.. తెలుగుదేశం ఆధ్వర్యంలో నిర్వహించిన ''ఇదేం ఖర్మ మన రాష్ట్రానికి'' కార్యక్రమంలో పాల్గొన్న ఎమ్మెల్సీ బచ్చుల అర్జునుడు.. తుపాను కారణంగా తడిసిన పొలాలను, ధాన్యాన్ని పరిశీలించారు. రంగుమారిన ధాన్యాన్ని ప్రభుత్వం కొనుగోలు చేసి రైతులను ఆదుకోవాలని డిమాండ్ చేశారు. కోడూరు మండలం విశ్వనాథపల్లి, నారేపాలెం, గాబ, పిట్టలంక గ్రామాల్లో.. మాండౌస్ తుపాను కారణంగా దెబ్బతిన్న పొలాలు, వాటికి అనుసంధానంగా ఉన్న డ్రైనేజీలను మాజీ సభాపతి మండలి బుద్ధప్రసాద్‌ పరిశీలించారు.
80శాతం రాయితీపై విత్తనాలు అందించాలి: డ్రైనేజీల తవ్వకాలకు కోట్ల రూపాయలు వెచ్చించినట్లు ప్రభుత్వం లెక్కలు చూపుతున్నా.. క్షేత్రస్థాయిలో పరిస్థితులు దారుణంగా ఉన్నాయని బుద్ధప్రసాద్‌ అన్నారు. ప్రభుత్వం వెంటనే 80 శాతం రాయితీపై విత్తనాలు అందించాలని డిమాండ్ చేశారు. పెనమలూరు నియోజకవర్గం మద్దూరులో రోడ్లపై ఆరబోసిన ధాన్యం రాశులను.. తెలుగుదేశం నేత బోడె ప్రసాద్ పరిశీలించారు. R.B.K.ల్లో ధాన్యం కొనుగోళ్లలో వ్యత్యాసం చూపుతున్నారని రైతులు ఆరోపించారు. ఆరబెట్టిన ధాన్యం రాశులను వెంటనే సేకరించాలని ప్రభుత్వాన్ని డిమాండ్ చేశారు.
కృష్ణా జిల్లా చల్లపల్లి మండలం పాత మాజేరులో.. వర్షాలకు మునిగిపోయిన వరి పొలాలను.. అవనిగడ్డ MLA సింహాద్రి రమేశ్‌బాబు, కలెక్టర్ రంజిత్ బాషా పరిశీలించారు. రైతులతో మాట్లాడి నష్టం వివరాలను తెలుసుకున్నారు. డ్రైనేజీల్లో పూడిక తీయకపోవడం వల్లనే సమస్యలు తలెత్తుతున్నాయని రైతులు మొర పెట్టుకున్నారు. సమస్య పరిష్కారానికి తక్షణ చర్యలు తీసుకోవాలని అధికారులను ఆదేశించారు.
ఉచితంగా విత్తనాలు అందజేసి రైతులను ఆదుకోవాలి: గుంటూరు జిల్లా తెనాలి నియోజకవర్గంలో.. తుపాను కారణంగా దెబ్బతిన్న పంట పొలాలను తెలుగుదేశం సీనియర్‌ నేత ఆలపాటి రాజేంద్రప్రసాద్ పరిశీలించారు. వరి ధాన్యాన్ని ప్రభుత్వమే కొనుగోలు చేయడంతోపాటు.. ఉచితంగా విత్తనాలు అందజేసి ఆదుకోవాలని కోరారు. వర్షాలకు తడిసిన, రంగు మారిన ధాన్యాన్ని ప్రభుత్వమే కొనుగోలు చేస్తుందని.. గుంటూరు జిల్లా కలెక్టర్ వేణుగోపాల్‌రెడ్డి స్పష్టం చేశారు. తెనాలి రెవెన్యూ డివిజన్‌ పరిధిలో.. దెబ్బతిన్న పొలాలను ఆయన పరిశీలించారు. రైతుల నుంచి ధాన్యం మొత్తం కొనుగోలు చేస్తామని... రెండో పంట వేసుకునేందుకు రాయితీపై విత్తనాలు అందజేస్తామని భరోసా ఇచ్చారు..
గత ఏడాది పరిహారం ఇప్పటికీ ఇవ్వలేదు: ఆరు రోజులుగా కురుస్తున్న వర్షాలకు శ్రీసత్యసాయి జిల్లాలో వరి, ఉద్యాన పంటలకు తీవ్ర నష్టం వాటిల్లింది. కదిరి నియోజకవర్గవ్యాప్తంగా కోతకు సిద్ధంగా ఉన్న సుమారు 300 ఎకరాల్లో వరి పంట దెబ్బతింది. పంటను పొలంలో వదలలేక, నూర్పిడికి ఖర్చు చేయలేక రైతులు విలవిలలాడుతున్నారు. గ్రాసంపై ఆశలు వదులుకుని.. సగానికి పంటను కోసుకుంటున్నారు. కూలీల ఖర్చులు భరించలేక కొందరు రైతులు పొలంలోనే పంటను వదిలేశారు. గాలి, వర్షం ధాటికి వరి పైరు నేలకొరిగి గింజలు మొలకెత్తుతున్నాయి. గత ఏడాది కూడా ఇదే రీతిలో తాము పంటను కోల్పోయినా... ఇప్పటికీ పరిహారం ఇవ్వలేదని రైతులు ఆవేదన వ్యక్తం చేస్తున్నారు.
నాలుగు రోజుల పాటు వరికోతలు బంద్ పెట్టాలి: అనంతపురం జిల్లా కణేకల్‌, బొమ్మనహాల్‌ మండలాల్లో తుపాను కారణంగా నేలవాలిన చెరకు, వరి పంటలను... జిల్లా వ్యవసాయాధికారి చంద్రనాయక్ పరిశీలించారు. దెబ్బతిన్న ప్రతి పంటను నమోదు చేసి.. రైతులకు పరిహారం అందేలా చూస్తామని హామీ ఇచ్చారు. పంట నష్టం అంచనాలను ప్రభుత్వానికి నివేదిక పంపామన్నారు. వర్షాలు కురుస్తుండటంతో... నాలుగు రోజుల పాటు వరి కోతలు ఆపేయాలని రైతులకు సూచన చేశారు.
తుపాను కారణంగా నష్టపోయిన రైతులను ఆదుకోవాలని డిమాండ్ చేస్తూ కర్నూలు జిల్లా ఓర్వకల్లు మండలం హుస్సేనాపురంలో తెలుగుదేశం పార్టీ ఆందోళన చేపట్టింది. హుస్సేనాపురం నుంచి ఓర్వకల్లు తహసీల్దారు కార్యాలయం వరకు ఎడ్లబండ్లతో ర్యాలీ నిర్వహించారు. గిట్టుబాటు ధర లేక అప్పులపాలై ఆత్మహత్యలు చేసుకున్న రైతులను ఆదుకోవాలని నాయకులు డిమాండ్ చేశారు..
నెల్లూరు జిల్లా కందుకూరు, ప్రకాశం జిల్లా కొండెపి నియోజకవర్గాల్లో.. నీట మునిగిన పొలాలు, తడిసిన ధాన్యం రాశుల్ని.. తెలుగుదేశం నేత సోమిరెడ్డి చంద్రమోహన్‌రెడ్డి పరిశీలించారు. రైతులను ఆదుకోవడంలో జాప్యమెందుకని ప్రభుత్వాన్ని ప్రశ్నించారు. పోగాకు రైతుల రుణాలను రీషెడ్యూల్ చేసి మళ్లీ పెట్టుబడికి సాయం చేయాలని బ్యాంకర్లను కోరారు.
ఇవీ చదవండి:
