Kotappakonda: కోటప్పకొండలో అర్చకుల ఆందోళన.. ఆర్జిత సేవలు నిలిపివేస్తామని ప్రకటన

Kotappakonda temple EO and priests Argument issue: కోటప్పకొండలోని శ్రీ త్రికోటేశ్వరస్వామి ఆలయ ఈవోకు, అర్చకుల మధ్య వివాదం నెలకొంది. ఆలయం ఈవో దుర్భాషలాడుతూ, ఆగమ శాస్త్రానికి విరుద్ధంగా ప్రవర్తిస్తున్నారని అర్చకులు వాపోయారు. ఈవోకి వ్యతిరేకంగా ఆర్జిత సేవలు నిలిపివేస్తున్నట్టు అర్చకులు ప్రకటించారు. విషయం తెలుసుకున్న దేవాశాఖ అధికారులు విచారణ జరుపుతున్నారు.

Kotappakonda temple EO and priests Argument issue: పల్నాడు జిల్లా కోటప్పకొండలోని శ్రీ త్రికోటేశ్వరస్వామి ఆలయ ఈవో వేమూరి గోపి, అర్చకుల మధ్య వివాదం నెలకొంది. ఈవో వేమూరి గోపి తమపై దుర్భాషలాడుతూ, ఆగమ శాస్త్రానికి విరుద్ధంగా ప్రవర్తిస్తున్నారని అర్చకులు ఆరోపిస్తున్నారు. ఈవోకి వ్యతిరేకంగా ఈ నెల 4వ తేదీ నుంచి ఆర్జిత సేవలను నిలిపివేస్తున్నట్టు అర్చకులు తెలిపారు. విషయం తెలుసుకున్న దేవాశాఖ అధికారులు.. డిప్యూటీ కమిషనర్‌ ఆధ్వర్యంలో విచారణ జరుపుతున్నారు.

4వ నుంచి ఆర్జిత సేవలు నిలిపివేస్తాం.. పల్నాడు జిల్లా కోటప్పకొండలోని శ్రీ త్రికోటేశ్వరస్వామి ఆలయ ఈవో వేమూరి గోపి, ఆలయ ప్రధాన అర్చకుల మధ్య పలు కీలక విషయాలపై వాగ్వాదం చోటు చేసుకుంది. దీంతో ఈనెల 4వ తేదీ నుంచి స్వామివారి ఆర్జిత సేవలను నిలిపివేస్తామంటూ.. ఆలయ ప్రధాన అర్చకులు ఆలయ ఈవో వేమూరి గోపికి వినతిపత్రాన్ని అందజేశారు. వినతిపత్రంలో..''మాపై (అర్చకులు) ఆలయ ఈవో వేమూరి గోపి దుర్భాషలాడుతూ.. ఆయనకు నచ్చినట్టుగా వ్యవహరిస్తున్నారు. అంతేకాకుండా, ఆగమ శాస్త్రానికి విరుద్ధంగా కార్యక్రమాలను నిర్వహిస్తున్నారు'' అని పేర్కొన్నారు.

ఆలయ ఈవోపై.. ఆలయ ఈవోకే ఫిర్యాదు.. వివాదంపై అర్చకులతో పాటు ఆలయ కార్యాలయ సిబ్బంది, అవుట్ సోర్సింగ్ ఉద్యోగులు జత కలిసి..ఆలయ ఈవో గోపిపై ఆలయ ఈవోకే ఫిర్యాదు చేశారు. ఈ నేపథ్యంలో దేవాదాయ శాఖ డిప్యూటీ కమిషనర్, ఆలయ పాలకవర్గ సభ్యులు, అధికారపార్టీ నేతలు పూనుకుని ఆలయ ఈవో, అర్చకులను సమస్యను పరిష్కరించేందుకు ఆలయ కార్యాలయంలో కూర్చోబెట్టి సుదీర్ఘంగా చర్చలు జరిపారు.

సమస్యపై డిప్యూటీ కమిషనర్ హామీ.. చర్చల అనంతరం ఆలయ ప్రధాన అర్చకులు మీడియాతో మాట్లాడుతూ.. ఆలయానికి ఈవోగా వేమూరి గోపి వచ్చినప్పటి నుండి ఆలయంలో ఆగమ శాస్త్రం ప్రకారం పూజలు జరగకుండా అడ్డుపడుతున్నారన్నారు. ఇక్కడ పని చేస్తున్న ఆలయ అర్చకులు, సిబ్బందిని ఈవో దుర్భాషలాడుతూ ఇబ్బందులకు గురి చేస్తున్నారని వ్యాఖ్యానించారు. అందుకు నిరసనగా ఆలయ అర్చకులందరమూ కలిసి ఈనెల 4వ తేదీ నుంచి ఆర్జిత సేవలను నిలిపివేస్తున్నట్లు వినతిపత్రాన్ని ఈవో వేమూరి గోపికి అందజేశామన్నారు. ఈ క్రమంలో దేవాదాయ శాఖ డిప్యూటీ కమిషనర్ చంద్రశేఖర్ రెడ్డి వచ్చి తమతో మాట్లాడారని.. 4వ తేదీ వరకూ తమ సమస్యను తీరుస్తామని హామీ ఇచ్చారని తెలిపారు. సమస్య పరిష్కరించకపోతే యథావిధిగా తాము ప్రకటించి విధంగా 4వ తేదీ నుండి ఆర్జిత సేవలను నిలిపివేస్తామని ఆలయ అర్చకులు వెల్లడించారు.

స్వల్ప వివాదమే.. దేవాదాయ శాఖా డిప్యూటి కమీషనర్ చంద్రశేఖరరెడ్డి మాట్లాడుతూ.. కోటప్పకొండ ఆలయంలో ఈవో, అర్చకుల మధ్య స్వల్ప వివాదమే జరిగిందన్నారు. ఈ నేపథ్యంలో అధికారుల సూచన మేరకు.. ఇక్కడకు వచ్చి ఇరువురితో చర్చలు జరిపామన్నారు. వారు తెలిపిన సమస్యలను అధికారుల దృష్టికి తీసుకువెళ్లి, సమస్య పరిష్కారం కోసం ప్రయత్నం చేస్తానని ఆయన వివరించారు.

ఇవీ చదవండి