Varla Ramaiah Comments on Phone Tapping : టీడీపీ అధినేత చంద్రబాబు ఫోన్తో సహా ప్రతిపక్ష నేతలందరీ ఫోన్లు జగన్ ప్రభుత్వం ట్యాప్ చేస్తోందని టీడీపీ పొలిట్ బ్యూరో సభ్యులు వర్ల రామయ్య ఆరోపించారు. వైసీపీ ప్రభుత్వం ఫోన్ ట్యాపింగ్ చేస్తోందనడానికి వైసీపీ ఎమ్మెల్యే కోటంరెడ్డి శ్రీధర్ రెడ్డి వ్యాఖ్యలే నిదర్శనమన్నారు. అధికార పార్టీ ఎమ్మెల్యే శ్రీధర్ రెడ్డి తన ఫోన్ను 8 నెలలుగా ట్యాప్ చేస్తున్నారని కన్నీళ్లు పెట్టుకున్నారని గుర్తు చేశారు. ఫోన్లు ట్యాప్ చేసే అధికారం, హక్కు ఈ ప్రభుత్వానికి ఎక్కడిదని ఆగ్రహం వ్యక్తం చేశారు.
పెగాసస్ ముసుగులో ప్రభుత్వం రాజ్యాంగ విరుద్ధంగా, అప్రజాస్వామికంగా వ్యవహరిస్తోందని దుయ్యబట్టారు. ఫోన్ ట్యాపింగ్ వ్యవహారంపై ప్రభుత్వం ఇంటెలిజెన్స్ చీఫ్ సీతారామాంజనేయుల్ని తక్షణమే సస్పెండ్ చేయాలని వర్ల డిమాండ్ చేశారు. ట్యాపింగ్ వ్యవస్థను నడిపిస్తున్న సజ్జల రామకృష్ణారెడ్డి సలహాదారు పదవికి రాజీనామా చేయాలన్నారు. ముఖ్యమంత్రికి ఏ మాత్రం నైతిక విలువలు ఉన్న ట్యాపింగ్కు బాధ్యత వహిస్తూ రాజీనామా చేయాలని ఆగ్రహం వ్యక్తం చేశారు. ముఖ్యమంత్రి ప్రజాధనం వృథా చేసి, ఎన్నిసార్లు దిల్లీ వెళ్లినా.. అవినాష్రెడ్డిని కాపాడలేరని ఎద్దేవా చేశారు.
"చంద్రబాబు ఫోన్, వర్ల రామయ్య పోన్, తెలుగు దేశం నేతల ఫోన్లు ట్యాప్ చేస్తే మీకు ఏం వస్తుంది. మీ ఎమ్మెల్యే భోరున విలపించాడు. ఇంతకు మించి ఆధారం ఏం కావాలి. వ్యక్తులు దొంగచాటుగా నడుపుతున్న ప్రభుత్వమిది. ఫోన్లు ట్యాంపింగ్ అనేది సరైంది కాదు. సీతారామంజనేయులుని వెంటనే సస్పెండ్ చేయాలని డిమాండ్ చేస్తున్నా." - వర్ల రామయ్య, టీడీపీ పొలిట్ బ్యూరో సభ్యులు
ఇవీ చదవండి :
