Jogi Ramesh Followers Attacked Pilgrims : దైవ దర్శనానికి వెళ్లి తిరిగొస్తున్న యాత్రికులపై మంత్రి జోగి రమేష్ అనుచరులు దాడికి తెగబడ్డారు. వారు వెళ్తున్న బస్సులను.. ఎమ్మెల్యే స్టిక్కర్లు ఉన్న కార్లను అడ్డుగా పెట్టి, విజయవాడ జాతీయ రహదారిపై బస్సులను నిలిపివేసి దౌర్జన్యానికి దిగారు. మహిళలని కూడా చూడకుండా నోటికొచ్చినట్లు దుర్భాషలాడారు. యువతుల పట్ల అసభ్యంగా ప్రవర్తించారు. డ్రైవర్తో గొడవ పడి బస్సును ఆపేయించారు. బస్సులో ఉన్న యువకులపై దాడి చేసి విలువైన సెల్‌ఫోన్‌ లాక్కున్నారు. మీ అంతు చూస్తామంటూ తీవ్ర భయభ్రాంతులకు గురిచేశారు. ఊహించని ఘటనతో ఒక్కసారిగా ఉలిక్కిపడిన యాత్రికులు.. తేరుకుని, పోలీసులకు ఫోన్ చేశారు.
జరిగింది ఇది : పల్నాడు జిల్లా ఫిరంగిపురానికి చెందిన భక్తులు రెండు బస్సుల్లో ఎన్టీఆర్ జిల్లా పెనుగంచిప్రోలులోని తిరుపతమ్మ దర్శనానికి వెళ్లారు. అదే ఆలయానికి ఇబ్రహీంపట్నంకు చెందిన 8 మంది యువకులు రెండు కార్లలో వచ్చారు. దైవదర్శనం చేసుకునే క్రమంలో.. అక్కడ బస్సులో వచ్చిన మహిళలు, యువతుల పట్ల యువకులు అసభ్యంగా ప్రవర్తించారు. దీంతో తోటి భక్తులు వారిని వారించారు. ఈ సమయంలో స్వల్ప ఘర్షణ, వాగ్వాదం చోటుచేసుకుంది. వాహనాల పార్కింగ్ విషయంలోనూ బస్సుల డ్రైవర్తో యువకులు గొడవకు దిగారు.
అక్కడ వివాదం సద్దుమణిగినా బస్సులో భక్తులు తిరుగు ప్రయాణమవుతుండగా.. కారుల్లో వచ్చిన యువకులు ఇబ్రహీంపట్నం మండలం జూపూడి వద్ద జాతీయ రహదారిపై కాపుకాసి బస్సులను అటకాయించారు. కార్లు అడ్డుపెట్టి ఆపేశారు. అనంతరం బస్సులో ఉన్న వారిపై దాడికి దిగారు. తాము మంత్రి జోగి రమేశ్‌ అనుచరులమంటూ చంపేస్తామని బెదిరించారని బాధితులు వాపోయారు. రెండు బస్సుల్లో ఉన్న మహిళలు, యువతుల పట్ల దురుసుగా ప్రవర్తించారు. పోలీసులకు ఫోన్ చేస్తామంటే ఓ యువకుడిని కొట్టి ఫోన్ లాక్కున్నారు. దాదాపు గంటసేపు బస్సులను జాతీయ రహదారిపై ఆపేసి.. హల్చల్ చేశారు.
అనంతలో ఆగని వైసీపీ అరాచకాలు.. జేసీ అనుచరుడిపై హత్యాయత్నం
రాజీ చేసుకోమన్న పోలిసులు.. బస్సులోని యాత్రికులు ఇబ్రహీంపట్నం పోలీసులకు ఫిర్యాదు చేయగా వారు వచ్చి ఇరు వర్గాలను స్టేషన్‌కు తీసుకెళ్లారు. వెంటనే స్థానిక వైఎస్సార్సీపీ నేతలు రంగంలోకి దిగారు. బాధితుల నుంచి ఎలాంటి ఫిర్యాదు తీసుకుకోకుండా పోలీసులపై ఒత్తిడి తీసుకువచ్చారనే ఆరోపణలు వచ్చాయి. దీంతో కేసు నమోదు చేయాల్సి వస్తే, ఇరువర్గాలపై కేసులు నమోదు చేయాల్సి వస్తుందని పోలీసులు బెదిరించారని బాధితులు వెల్లడించారు. దాడికి పాల్పడిన వారు విద్యార్థులు కావడంతో వారి భవిష్యత్‌ను దృష్టిలో ఉంచుకుని తాము ఫిర్యాదు చేయడం లేదని పోలీసులు బాధితుల వద్ద లేఖ రాయించుకుని ఎవరినీ అరెస్ట్ చేయకుండా వదిలేశారు.
ఎమ్మెల్యే స్టిక్కర్ల మాటేంటి? : పెనుగంచిప్రోలులో గొడవ జరిగినప్పుడు కార్లకు నెంబర్ ప్లేట్లు ఉన్నాయని జూపూడిలో మాత్రం వాటిని తీసివేశారని బాధితులు ఆరోపించారు. అయితే దాడికి పాల్పడిన యువకుల కార్లపై ఎమ్మెల్యే స్టిక్కర్లు ఉండటం గమనార్హం. ఆ రెండు కార్లకు ఎమ్మెల్యే స్టిక్కర్లు ఎలా వచ్చాయో కూడా పోలీసులు ఆరా తీయలేదు.
"బస్సు ఎక్కి జోగి రమేష్ అనుచరులం అని తొడకొట్టారు. మాకు, వాళ్లుకు ఎటువంటి గొడవలు లేవు. మా చొక్కాలు చింపారు. మా వాడిది 40 వేల రూపాయాల ఫోన్ లాక్కోని వెళ్లిపోయారు."- బాధిత యాత్రికులు
నెంబర్ లేని కార్లతో మంత్రి జోగి రమేష్ అనుచరుల హల్చల్
