పత్తికొండలో వైసీపీ ఎమ్మెల్యే అనుచరుడు వీరంగం.. దళితులపై దాడి

Land Disputes in Kurnool District: కర్నూలు జిల్లా పత్తికొండ నియోజకవర్గంలో అధికార పార్టీకి చెందిన ఎమ్మెల్యే అనుచరుడు వీరంగం సృష్టించాడు. దళితుల భూమిలోకి వెళ్లి దున్నించే ప్రయత్నం చేయడంతో వారు ఇదేంటని ప్రశ్నించడంతో వారిపై దాడి చేయడమే కాకుండా. కులం పేరుతో దూషించాడు. గాయపడిన దళిత యువకుడు, అతని కుటుంబం తమకు న్యాయం చేయాలని పోలీసులను ఆశ్రయించారు.

YSRCP leader attacked on Dalit family: తమకు అనుకూలమైన పార్టీ అధికారంలో ఉంది.. ఎమ్మెల్యే మనోడే.. తాము ఏం చేసిన చెల్లుతుంది.. అడిగే వాడే లేడు.. అడ్డొచ్చేవాడు లేడనుకున్నాడు అతను. అందుకు అమయాకులైన దళితులను టార్గెట్ చేసుకున్నాడు. వారి భూమిలోకి వచ్చి వారిపైనే దాడి చేయడంతో ఆ కుటుంబం ఆసుపత్రి పాలైంది. తమపై దాడి చేసిన ఎమ్మెల్యే అనుచరుడిని వెంటనే అరెస్టు చేయాలని వారు పోలీసు సేషన్ తలుపుతట్టిన ఘటన కర్నూలు జిల్లాలో చోటు చేసుకుంది.

కర్నూలు జిల్లా పత్తికొండ నియోజకవర్గంలో అధికార పార్టీ నాయకుల ఆగడాలు శ్రుతి మించుతున్నాయి. పత్తికొండ మండలం చిన్నహుల్తి సమీపంలో ఓ పొలం విషయంలో, దళిత యువకుడిని వైసీపీ నేత చితకబాదారు. ఎమ్మెల్యే కంగాటి శ్రీదేవి ముఖ్య అనుచరుడైన అటికలగుండు బాబిరెడ్డి, మధు అనే యువకుడిపై దాడికి పాల్పడ్డారు. అడ్డొచ్చిన కుటుంబ సభ్యులను చితకబాదారు. బాధితులు పోలీసులను ఆశ్రయించారు.