chandrababu naidu fire on jagan Government : ముస్లింలపై జగన్ ప్రభుత్వం కక్ష కట్టిందని, ముస్లింలపై దాడులు పెరిగాయని తెలుగుదేశం అధినేత చంద్రబాబు ధ్వజమెత్తారు. వేధింపుల కారణంగా నంద్యాలలో అబ్దుల్ సలాం కుటుంబంతో సహా ఆత్మహత్య చేసుకున్నారని ఆగ్రహం వ్యక్తం చేశారు. ఉర్దూను రెండో అధికార భాషగా చేసిన ఘనత టీడీపీదే అని తేల్చిచెప్పారు. పార్టీ కేంద్ర కార్యాలయం ఎన్టీఆర్ భవన్ సమీపంలో చంద్రబాబు ఆధ్వర్యంలో తెలుగుదేశం పార్టీ ఇఫ్తార్ విందు ఏర్పాటు చేసింది. రాష్ట్రంలోని వివిధ ప్రాంతాల నుంచి ముస్లిం మైనార్టీలు పెద్దఎత్తున హాజరయ్యారు. ఇఫ్తార్ విందు కార్యక్రమంలో షరీఫ్, ఫరూఖ్, నాగుల్ మీరా తదితర నాయకులు పాల్గొన్నారు. ముస్లింలతో కలిసి టీడీపీ అధినేత చంద్రబాబు, రాష్ట్ర అధ్యక్షుడు అచ్చెన్నాయుడు నమాజ్ ప్రార్థనల్లో పాల్గొన్నారు. ముస్లింలతో ఉపవాస దీక్షను చంద్రబాబు విరమింపజేశారు.
టీడీపీ హయాంలో మత సామరస్యం... రంజాన్ అంటే క్రమశిక్షణ, దాతృత్వం, ఉదారమైన స్వభావాల మేలు కలయిక అని అన్నారు. హైదరాబాదులో మత కలహాలను అణచి వేసి.. మత సామరస్యాన్ని తెలుగుదేశం కాపాడిందని తెలిపారు. ముస్లిం మైనార్టీల్లోని పేదలను ఆదుకునేందుకు మైనార్టీ ఫైనాన్స్ కార్పోరేషన్ ఏర్పాటు చేసింది ఎన్టీఆర్ అని చెప్పారు. వేరే రాష్ట్రాల నుంచి కాకుండా హజ్ హౌస్ నిర్మించి హైదరాబాద్ నుంచే హజ్ యాత్రకు పంపే ఏర్పాట్లు చేసిందన్నారు. 2014 తర్వాత విజయవాడ, కర్నూల్లో హజ్ హౌస్ లు నిర్మించామని, కర్నూల్లో ఉర్దూ యూనివర్శిటీ పెట్టామని వివరించారు.
చంద్రబాబూ స్ఫూర్తితో రంజాన్ తోఫా... చంద్రబాబు పేరుకు హిందువైనా ఆచరణ పరంగా ముస్లిమేనని శాసనమండలి మాజీ ఛైర్మన్ షరీఫ్ వ్యాఖ్యానించారు. మానవ మృగాల వైపు ముస్లింలు ఉండకూడదని, చంద్రబాబుకు ముస్లింలకు అండగా నిలవాలని పిలుపునిచ్చారు. చంద్రబాబు సీఎం కావాలని ముస్లింలు సహకరించాలని కోరారు. చంద్రబాబు రంజాన్ తోఫా పెడితే.. జగన్ తీసేశారని తెలుగుదేశం సీనియర్ నేత జలీల్ ఖాన్ ధ్వజమెత్తారు. చంద్రబాబు స్ఫూర్తితో విజయవాడ పశ్చిమ నియోజకవర్గంలో రంజాన్ తోఫా ఇస్తున్నామన్నారు.
ఉర్దూను రెండో అధికార భాషను చేసిన ఘనత టీడీపీదే. బెంగుళూరుకో, ముంబాయికో వెళ్లాల్సిన అవసరం లేకుండా హైదరాబాద్ నగరంలో మైనార్టీల కోసం హజ్ యాత్ర ప్రారంభించింది టీడీపీ మాత్రమే. నవ్యాంధ్రప్రదేశ్లో కర్నూలులో ఉర్దూ యూనివర్సిటీ ఏర్పాటు చేయడంతో పాటు దుల్హన్ పథకాన్ని ప్రారంభించాం. మైనార్టీ యువతుల వివాహానికి 50వేల రూపాయలు అందించింది తెలుగుదేశం ప్రభుత్వం మాత్రమే. కానీ, ఇప్పుడు ఎన్నో ఆంక్షలు పెట్టారు. మైనార్టీలపై దాడులు పెరిగాయి. వేధింపులతో ఆత్మహత్యలు చేసుకునే పరిస్థితులు దాపురించాయి. ముస్లింలపై ఈ ప్రభుత్వం వివక్ష చూపిస్తోంది. ఈ రాష్ట్రం అభివృద్ధి కావాలంటే తెలుగుదేశం పార్టీ మళ్లీ అధికారంలోకి రావాల్సిన అవసరం ఉంది. - నారా చంద్రబాబు నాయుడు, టీడీపీ అధినేత
ఇవీ చదవండి :
