నిత్యం శాస్త్రీయ కళల సాధనతో కళకళలాడే విజయవాడలోని ఘంటసాల సంగీత కళాశాల... వేసవిలో మరింత సందడిగా మారింది. నేటి తరం వారికి అద్భుత సంగీతాన్ని పరిచయం చేయాలనే ఉద్దేశంతో భాషా సాంస్కృతిక శాఖ కృషి చేస్తోంది. అందులో భాగంగానే ఘంటసాల కళాశాలలో ఏటా వేసవి శిక్షణ శిబిరాలను నిర్వహిస్తూ చిన్నారులకు శాస్త్రీయ సంగీతాన్ని పరిచయం చేస్తున్నారు. సంగీతం, నృత్యంతో పాటు కథలు, పద్యాలు, వ్యాసాలు, ఇలా 11 రకాల అంశాలపై చిన్నారులకు వేసవి శిక్షణ అందిస్తున్నారు.
ఓనమాల నృత్యం ప్రత్యేకం
కార్పొరేట్ విద్యావ్యవస్థ కారణంగా అమ్మ భాషకు నేటి తరం చిన్నారులు దూరమైపోతున్నారు. అ, ఆ లు కూడా చెప్పలేని దుస్థితి నెలకొంది. అందుకే ఈ వేసవి శిబిరంలో నాట్యం చేర్చుకునేందుకు వచ్చే వారిలో 9 ఏళ్ల కంటే తక్కువ వయస్సున్న వారికి అక్షరాలతో నాట్యాభ్యాసం చేయిస్తున్నారు. అ నుంచి ఱ వరకు వల్లెవేయిస్తూ లయబద్ధంగా నాట్యం చేయిస్తున్నారు.
ప్రాథమికాంశాల బోధన
ఒక్క నెలలో చిన్నారులకు మొత్తం సంగీతం నేర్పించడం సాధ్యం కాదు. అందుకే స్వరాలంటే ఏంటి, సంగీతమంటే ఏంటనే ప్రాథమిక అంశాలు వివరిస్తూ... అన్నమాచార్య కీర్తనలు, దేశభక్తి గీతాలను తాళయుక్తంగా నేర్పిస్తున్నారు. సంగీతం, నృత్యంతో పాటు కథలు, పద్యాలు, వ్యాసాలు, ఇలా 11 రకాల అంశాలపై చిన్నారులకు వేసవి శిబిరంలో శిక్షణ అందిస్తున్నారు. వీటిల్లో చాలా వరకు ఈనెల 10వ తేదీతో ముగిసిపోగా... సంగీతం, నృత్యం, చిత్రలేఖనం తరగతులను ఈ నెలాఖరు వరకు పొడిగించారు.
