కృష్ణా జిల్లాలో కరోనా జడలు విప్పింది. ప్రతి రోజూ అధిక సంఖ్యలో కొత్త కేసులు నమోదవుతున్నాయి. మృతుల సంఖ్య కూడా పెరిగిపోతోంది. ఆదివారం ఒక్క రోజులో మరో 66 పాజిటివ్ కేసులు నమోదయ్యాయి. జిల్లాలో గత నాలుగు రోజుల్లో తొమ్మిది మంది వైరస్ బారినపడి మృతి చెందారు. కొత్తగా వచ్చిన కేసులతో కలిపి జిల్లాలో మొత్తం కేసుల సంఖ్య 1048కి చేరింది. వీరిలో 458 మంది డిశ్ఛార్జి అయ్యారు. మొత్తం 36 మంది ఇప్పటివరకూ వైరస్ బారినపడి మృతి చెందారు. కరోనా మరణాల్లో రాష్ట్రంలోనే జిల్లా మొదటి స్థానంలో ఉంది.
జూన్లోనే అధికం
కరోనా పాజిటివ్ కేసుల సంఖ్య జూన్ ఆరంభం నుంచి జిల్లాలో విపరీతంగా పెరిగిపోయింది. జూన్ 1 నుంచి 21 వరకూ 583 కేసులు నమోదయ్యాయి. వీటిల్లో ఈ నెల 15 నుంచి 21 వరకు 347 కేసులు నమోదయ్యాయి. మొత్తం కేసుల్లో... 60 శాతం జూన్లోనే నమోదు కావటం ఆందోళన కలిగిస్తోంది. తాజాగా వస్తున్న కేసుల్లో 90 శాతం విజయవాడ నగరంలోనే ఉంటున్నాయి. కరోనా పాజిటివ్ కేసులు జిల్లాలో ఎన్ని వచ్చాయి, ఎక్కడెక్కడ వచ్చాయనే వివరాలను జిల్లా అధికారులు గత నెల రోజులుగా బయట పెట్టడం లేదు. గత రెండు రోజులుగా జిల్లాలో వచ్చిన మొత్తం కేసుల సంఖ్యను మాత్రం వెల్లడిస్తున్నారు.
అయితే ఏంటి?
భారీగా కేసులు నమోదైన జిల్లాల్లో కర్నూలు తర్వాతి స్థానంలో కృష్ణా జిల్లా ఉంది. కానీ జనం మాత్రం సామాజిక దూరం పాటించట్లేదు. నడిరోడ్లపైనే మూత్రవిసర్జన, ఉమ్మివేయడం లాంటివి యథేచ్ఛగా చేస్తున్నారు. దుకాణాదారుల్లో సగం మంది మాస్కులే ధరించటం లేదు. నగరంలో తిరిగే ఆటోల్లో కిక్కిరిసిపోయి ప్రయాణాలు చేస్తున్నారు. ఈ నిర్లక్ష్యమే కేసుల పెరుగుదలకు ప్రధాన కారణంగా మారుతోంది.
ఇదీ చదవండి
