కొవిడ్‌ కేసులు అంతకంతకూ పెరుగుతున్న నేపథ్యంలో ఆలయాల్లో దర్శనాలకు భక్తులను అనుమతించాలా ? లేక మరిన్ని ఆంక్షలు విధించాలా అనే అంశాలపై సూచించాలని రాష్ట్ర దేవాదాయశాఖ ప్రభుత్వాన్ని కోరింది.
ప్రభుత్వానికి ప్రతిపాదనలు..
కమిషనర్‌ కార్యాలయం నుంచి కీలక ప్రతిపాదనలను ప్రభుత్వానికి పంపించారు. అనేక ఆలయాల్లో అర్చకులు, ఉద్యోగులు కొవిడ్‌ బారినపడ్డారు. మరోవైపు.. కేంద్ర పురావస్తుశాఖ పరిధిలో ఉండే అన్ని ఆలయాల్లో మే 15 వరకు భక్తులకు దర్శనాలు నిలిపేశారు. ఫలితంగా రాష్ట్రంలోని దేవాదాయశాఖ పరిధిలోని ఆలయాల్లో ఆంక్షలు అమలుపై తగిన ఆదేశాలు ఇవ్వాలని కోరింది. దర్శనాలు పూర్తిగా నిలిపేయాలా ? గంటకు కొంత మంది చొప్పున పరిమితంగా అనుమతించాలా ? అనే స్పష్టత ఇవ్వాలని అడిగింది. ఉత్సవాలు, కల్యాణాలను సైతం భక్తులు లేకుండా ఏకాంతంగా నిర్వహించడంపైనా ప్రతిపాదించారు.
మాస్క్ ఉంటేనే అనుమతి..
ప్రస్తుతం మాస్క్ ఉంటేనే భక్తులను అనుమతిస్తున్నారు. భక్తుల మధ్య, క్యూ లైన్ల మధ్య దూరం ఉండేలా చూడటం, చిన్నారులు, 60 ఏళ్లు పైబడిన వారిని అనుమతించకపోవడం వంటివి మరింత కఠినంగా అమలు చేయడంపైనా ఉన్నతాధికారుల ఆదేశాల కోసం ఎదురు చూస్తున్నారు.
