తెలుగుదేశం పార్టీ అధినేత చంద్రబాబు వ్యక్తిత్వాన్ని దెబ్బతీసే మాఫియా కుట్రను తీవ్రంగా ఖండిస్తున్నామని... తెదేపా కేంద్ర కార్యాలయం ఓ ప్రకటన విడుదల చేసింది. దేశవ్యాప్తంగా 40 చోట్ల జరిగిన ఐటీ దాడుల్లో మొత్తం 2 వేల కోట్ల రూపాయలకు సంబంధించి అవకతవకలు జరిగినట్లు ఆదాయపు పన్ను శాఖ ప్రకటిస్తే... అవన్నీ తెదేపాకు ఆపాదించే కుట్ర జరుగుతోందని మండిపడింది.
చంద్రబాబు మాజీ పీఎస్‌ శ్రీనివాస్‌ ఇంట్లో జరిగిన ఐటీ సోదాల్లో ఏమీ దొరకలేదని తెలిపింది. శ్రీనివాస్‌ 9 నెలల కిందట రాజీనామా చేసి చంద్రబాబు ఆఫీసు నుంచి రిలీవ్‌ అయ్యారని గుర్తుచేసింది. వాస్తవానికి ఐటీ దాడులకు గురైన ఒక ఇన్‌ఫ్రా కంపెనీకి జగన్ ప్రభుత్వం పోలవరం కాంట్రాక్టును రివర్స్‌ టెండరింగ్ ద్వారా కట్టబెట్టిందని ఆరోపించింది. ఐటీ దాడులకు గురైన సంస్థకు పోలవరం, వెలిగొండ ప్రాజెక్టులను ఎలా అప్పగించిందని ప్రకటనలో నిలదీసింది.
బురద జల్లే ప్రయత్నం
షెల్‌, సూట్‌కేసు కంపెనీలు ఏర్పాటు చేసి, మనీల్యాండరింగ్‌కు పాల్పడి అంతర్జాతీయ స్థాయిలో రాష్ట్ర పరువు తీసిన వ్యక్తి జగన్మోహన్‌రెడ్డి అని తెదేపా ఆ ప్రకటనలో ధ్వజమెత్తింది. మారిషస్‌ ప్రభుత్వం ఇంటర్నేషనల్‌ కోర్ట్‌ ఆఫ్‌ జస్టిస్‌లో జగన్మోహన్‌రెడ్డి కంపెనీపై కేసు దాఖలు చేసిన మాట వాస్తవం కాదా అని ప్రశ్నించింది. 43 వేల కోట్ల రూపాయల అవినీతితో 11 కేసుల్లో పూర్తిగా కూరుకుపోయిన జగన్... తమ బురదను చంద్రబాబు కుటుంబానికి అంటించేందుకు దుష్ప్రచారం చేస్తున్నారని తెదేపా ఆరోపించింది.
సీఎం జగన్ను ప్రశ్నించండి
చంద్రబాబు కుటుంబం 8 ఏళ్ల నుంచి ఆస్తులను బహిరంగపరుస్తూనే ఉందని తెదేపా కార్యాలయం వెల్లడించింది. సీఎం జగన్మోహన్‌రెడ్డి కుటుంబసభ్యుల ఆదాయాన్ని బహిరంగపరచమని వైకాపా నేతలు ఎందుకు అడగడం లేదని ప్రశ్నించింది. వైకాపా అవినీతి డబ్బు, దౌర్జన్యం, అబద్ధాలతో రాజకీయం చేస్తోందని తెదేపా ఆరోపించింది.
