Sarpanches Dharna across the state: పంచాయతీలకు కేంద్ర ప్రభుత్వం మంజూరు చేసిన 14, 15 ఆర్థిక సంఘ నిధులను సీఎఫ్‌ఎంఎస్‌ ఖాతాల నుంచి దారి మళ్లించడంపై రాష్ట్రవ్యాప్తంగా సర్పంచ్లు భగ్గుమన్నారు. ప్రభుత్వానికి వ్యతిరేకంగా ర్యాలీలు, నిరసనలతో హోరెత్తించారు. రాష్ట్రంలోని 12 వేల 900 వందల గ్రామాలకు రావాల్సిన 8 వేల 660 కోట్ల రూపాయలను పంచాయతీలు, సర్పంచ్ల అనుమతి లేకుండా మళ్లించడాన్ని తీవ్రంగా ఖండించారు. ప్రభుత్వం వాడుకున్న నిధులను తిరిగి తమ ఖాతాల్లో జమ చేయాలని సర్పంచులు.. కలెక్టర్లకు వినతి పత్రం ఇచ్చేందుకు వెళ్లగా.. కొన్ని చోట్ల ఉద్రిక్తతలకు దారి తీసింది.
ఉమ్మడి పశ్చిమ గోదావరి జిల్లా.. ఆర్ధిక సంఘం నిధులను దారి మళ్లించడమే కాకుండా పంచాయతీల అభివృద్ధిని అటకెక్కించిన ఘనత.. ముఖ్యమంత్రి జగన్మోహన్‌ రెడ్డికే దక్కుతోందని ఉమ్మడి పశ్చిమ గోదావరి జిల్లా సర్పంచ్లు ఆరోపించారు. నిధులు, విధులు లేకుండా పంచాయతీలను డమ్మీలుగా మార్చడాన్ని నిరసిస్తూ.. ఏలూరులో ర్యాలీ నిర్వహించారు. కేంద్రం విడుదల చేసిన 8వేల 660 కోట్లను వెంటనే పంచాయతీల ఖాతాల్లో జమ చేయాలని జిల్లా స్పందన కార్యక్రమంలో కలెక్టర్‌కు వినతి పత్రం అందించారు.
కర్నూలు.. ప్రభుత్వం వాడుకున్న నిధులను తిరిగి ఇప్పించాలని కోరుతూ.. కర్నూలు, కలెక్టరేట్ వద్ద సర్పంచ్లు ఆందోళన చేశారు. వాలంటీర్‌, సచివాలయ వ్యవస్థలను సర్పంచ్ల పరిధిలోకి తీసుకురావాలని డిమాండ్ చేశారు. కలెక్టర్‌ను కలిసేందుకు పోలీసులు అనుమతించకపోవడంతో గేట్లు ఎక్కి లోపలికి వెళ్లేందుకు సర్పంచ్లు యత్నించారు. ఈ క్రమంలో కలెక్టరేట్ వద్ద కొంత ఉద్రిక్తత పరిస్థితి నెలకొంది.
నెల్లూరు జిల్లా.. పంచాయతీల్లో నిధులు లేకపోవడంతో గ్రామాల్లో అభివృద్ధి కుంటుపడుతోందని.. సర్పంచ్లు కేవలం ఉత్సవ విగ్రహాలుగానే మిగిలిపోతున్నారని నెల్లూరు కలెక్టరేట్ వద్ద సర్పంచ్లు ధర్నా నిర్వహించారు. నగరాలోని ప్రముఖ కూడళ్ల నుంచి కలెక్టర్ కార్యాలయం వరకు నిరసన ర్యాలీ చేపట్టారు. సర్పంచ్ల సమస్యల్ని పరిష్కరించాలని 15 డిమాండ్లతో కూడిన వినతి పత్రాన్ని కలెక్టర్‌కు అందజేశారు.
ఉమ్మడి చిత్తూరు జిల్లా.. కేంద్రం పంపిన నిధులతో ముఖ్యమంత్రి జగన్‌ బటన్లు నొక్కుతూ.. పంచాయతీలను అణగదొక్కుతున్నారని ఉమ్మడి చిత్తూరు జిల్లా సర్పంచ్లు ఆందోళన చేశారు. పంచాయతీలపై సీఎం కక్షపూరిత ధోరణిని మానుకోవాలని సూచించారు. సర్పంచ్ల సమస్యలను ప్రభుత్వం వెంటనే పరిష్కరించాలని లేని పక్షంలో చలో అసెంబ్లీ, చలో దిల్లీ చేపడతామని హెచ్చరించారు.
శ్రీకాకుళం జిల్లా.. సర్పంచ్‌లకు రావాల్సిన నిధుల్ని వెంటనే విడుదల చేయకపోతే సీఎం ఇంటిని ముట్టడిస్తామని శ్రీకాకుళం జిల్లా పరిషత్‌ కార్యాలయం ఎదుట సర్పంచ్లు అర్ధనగ్న ప్రదర్శన చేశారు. వైసీపీ సహా ఇతర పార్టీ సర్పంచ్లు స్పందనలో కలెక్టర్‌కు వినతి పత్రం అందజేశారు.
అనకాపల్లి జిల్లా.. తమ నిధులు విధులను కాజేసిన వారిపై చర్యలు తీసుకోవాలని కోరుతూ అనకాపల్లి జిల్లా కలెక్టర్ కార్యాలయం వద్ద సర్పంచుల సంఘం ఆధ్వర్యంలో నిరసన చేపట్టారు. జైల్లో పెట్టిన మాదిరిగా తమని ఉంచి గ్రామాల్లో అభివృద్ధి అనేది లేకుండా వైసీపీ ప్రభుత్వం చేసిందని ఆరోపిస్తూ కలెక్టర్ కార్యాలయం వద్ద సర్పంచుల సంఘం ఆధ్వర్యంలో ఆందోళన చేపట్టారు. ఫిర్యాదు చేయడానికి కార్యాలయంలోకి వెళ్తుండగా పోలీసులు అడ్డుకున్నారు.. దీంతో ఉద్రిక్తత నెలకొంది.
విజయనగరం.. జిల్లాలోని కలెక్టరేట్ వద్ద చేపట్టిన ఈ ధర్నాలో పలు గ్రామాలకు చెందిన సర్పంచ్లు పాల్గొన్నారు. తొలుత బాపూజీ కూడలి నుంచి కలెక్టరేట్ వరకు నిరసన ర్యాలీ చేపట్టారు. అనంతరం కలెక్టరేట్ ప్రధాన ద్వారం ముందు ధర్నా నిర్వహించారు. ధర్నా అనంతరం., 15 డిమాండ్ లతో కూడిన వినతిపత్రాన్నిస్పందనలో కలెక్టర్ నాగలక్ష్మికి అందచేశారు. రాష్ట్రం నుంచి నిధులే కాకుండా., కేంద్రం విడుదల చేసిన నిధులు సైతం దారి మళ్లిపోవటమే ఇందుకు కారణమని వాపోయారు.
