రాష్ట్రంలో నిర్మాణ రంగం ఎక్కువగా ఉండే ప్రాంతాల్లో గుంటూరు జిల్లా ఒకటి. అయితే ఇసుక లభ్యత సరిగ్గా లేకపోవటంతో నిర్మాణాలు ముందుకు కదలడంలేదు. నిన్నా మొన్నటివరకు లాక్డౌన్తో ఆగిపోయిన పనులు.. ఆంక్షల సడలింపులతో మొదలుపెట్టినా ఇసుక కొరతతో ఊపందుకోవడంలేదు. నిర్మాణ పనులు మొదలవటంతో ఇసుకకు డిమాండ్ పెరిగింది.
మీసేవా కేంద్రాలతో పాటు గ్రామ సచివాలయాల్లోనూ ఆన్లైన్లో ఇసుక బుక్ చేసుకునే సదుపాయం కల్పించారు. అయితే బుక్ చేసుకున్న చాలారోజులకు ఇసుక ఇంటికి చేరడం లేదని వినియోగదారులు చెప్తున్నారు. డిమాండ్ భారీగా ఉండడం, వాహనాల కొరతతో సమయానికి ఇసుక అందడంలేదు. వచ్చిన ఇసుక నాణ్యత బాగుండడంలేదని వాపోయారు.
ఎదురుచూపులు తప్పడంలేదు
ప్రస్తుతం జిల్లాలో 5 లక్షల టన్నుల రిజర్వ్ నిల్వలు ఉన్నాయి. వర్షాకాలంలో ఇబ్బంది లేకుండా 10.50 లక్షల టన్నులు రిజర్వ్ చేయాలని అధికారులు భావిస్తున్నారు. యార్డులలో 55 వేల టన్నుల ఇసుక ఉన్నట్లు చెప్తున్నారు. దానిని ముందుగా వినియోగదారులకు సరఫరా చేసేలా చర్యలు చేపట్టారు. అయితే చాలామందికి ఇసుక సకాలంలో అందటం లేదు. ఆన్ లైన్లో డబ్బులు చెల్లించినా ఇసుక రావట్లేదని చెప్తున్నారు. తెలిసిన వారి వాహనాలు తీసుకుని యార్డుకు వెళ్లే వారికి కొంత త్వరగానే వస్తుంది. అలా కాకుండా వాళ్లే పంపిస్తారునే అని వేచి చూస్తే... ఎదురు చూపులు తప్పటం లేదంటున్నారు వినియోగదారులు.
నాణ్యత ఎక్కడ?
మరోవైపు సరఫరా అవుతున్న ఇసుక నాణ్యత లేకుండా వస్తోంది. బంకమట్టి, గుండ్రాలు, వేర్లు ఇలా చెత్తాచెదారం అంతా కలిపి వస్తోందని వినియోగదారులు ఆరోపిస్తున్నారు. ఇలాంటి ఇసుకతో కట్టడాలు కడితే వాటి నాణ్యత ప్రశ్నార్థకమంటున్నారు. బుక్ చేసిన 2, 3 వారాలకు గాని ఇసుక రావటం లేదని.. అదీ కూడా ఇలా వస్తే ఏం చేయాలని ప్రశ్నిస్తున్నారు. ఇసుక నాణ్యతపై ఫిర్యాదు చేసినా సరైన స్పందన లేదంటున్నారు. గతంలో అయితే ఇలాంటి ఇసుక వస్తే వెనక్కు పంపేవాళ్లమని... ఇపుడు ఏది దొరికితే అదే వాడాల్సి వస్తోందని నిర్మాణదారులు చెబుతున్నారు.
వర్షాకాలం ప్రారంభం కావటంతో ఇసుక తవ్వకాలు నిలిచిపోనున్నాయి. అందుకే ముందు జాగ్రత్తగా డంపింగ్ యార్డుల వద్ద సరిపడా స్టాకు పెట్టేలా చర్యలు చేపడుతున్నారు. పెద్దమొత్తంలో ఇసుక తీసుకెళ్లే వారికి అనుమతి ఇచ్చే వ్యవహారాన్ని సంయుక్త కలెక్టర్ పర్యవేక్షిస్తున్నారు. బల్క్ వినియోగదారులకు వారి అవసరాన్ని బట్టి లెక్కగట్టి విడతల వారీగా అందజేయనున్నారు.
ఇవీ చదవండి...
