గుడికి వచ్చిన భక్తురాలితో పూజారి అసభ్య ప్రవర్తన

భక్తుల కోరికలని దేవుడి వద్దకు చేర్చే పవిత్రమైన పూజారి వృత్తిలో ఉన్నాడతను. నిత్యం ఆ దేవదేవుడికి పూజాకార్యక్రమాలు నిర్వహించే అర్చకుడతడు. పూజారి అంటే ఎనలేని నమ్మకంతో ఉంటారు భక్తులు. అలాంటి వ్యక్తి... ఆ లోకానికే మచ్చ తెచ్చే పని చేశాడు. తన కోరికలను భగవంతుడికి చెప్పుకునేందుకు వచ్చిన భక్తురాలితో అసభ్యంగా ప్రవర్తించాడు. గుంటూరు జిల్లా వైకుంఠపురం వేంకటేశ్వరస్వామి ఆలయంలోని పూజారి ఉదంతంమిది.

గుంటూరు జిల్లా అమరావతి మండలం వైకుంఠపురం వేంకటేశ్వర స్వామికి ఎనలేని విశిష్టత ఉంది. ఆ స్వామిని దర్శించుకుంటే సంతానం కలుగుతుందనే విశ్వాసం వ్యాప్తిలో ఉంది. సంతాన భాగ్యం కోసం స్వామివారిని దర్శించుకునేందుకు సోమవారం విజయవాడ నుంచి దంపతులు తమ కుటుంబసభ్యులతో కలిసి వచ్చారు. అర్చకుడు నరసింహాచార్యుల పాదాలకు నమస్కారం చేశారు.

అప్పుడా పూజారి... తమ కోరిక నెరవేరాలంటే మహిళ ఒంటరిగా పూజ చేయాలని చెప్పి... ఆమెను ఆలయం లోపలికి తీసుకెళ్లాడు. అక్కడ అసభ్యంగా ప్రవర్తించాడు. ఆ మహిళ అరుస్తూ బయటకు వచ్చేసింది. కుటుంబసభ్యులు వెళ్లి చూసేసరికి నరసింహాచార్యులు అక్కడి నుంచి పరారయ్యాడు. ఈ ఘటన గురించి ఆలయ అధికారులకు సమాచారమిచ్చి వారు వెళ్లిపోయారు. పోలీసులు కేసు నమోదు చేసుకొని దర్యాప్తు చేస్తున్నారు.

ఇవీ చదవండి..