పురుగులమందు డబ్బాతో పొలంలో బైఠాయించిన తల్లీకూతుళ్లు
గుంటూరు జిల్లా కర్లపాలెం మండలం గణపవరం గ్రామానికి చెందిన పేదలకు నివేశన స్థలాలు ఇచ్చేందుకు రెవెన్యూ అధికారులు ఎకరా ఆరు సెంట్ల భూమిని స్వాధీనం చేసుకున్నారు. అనంతరం చదును చేసి రోడ్లు వేశారు. హద్దులు నిర్ణయించి రాళ్లు వేసేందుకు వచ్చిన సిబ్బందిని అక్కడి మహిళా రైతులైన తల్లీకూతుళ్లు నాగేంద్రమ్మ, భూలక్ష్మి అడ్డుకున్నారు. 50 ఏళ్ల క్రితం తాము ఈ భూమిని కొన్నామని అప్పటి నుంచి సాగు చేసుకుంటున్నామని అధికారులకు తెలిపారు. ఇప్పుడు ఉన్న ఆ కాస్తంత భూమిని స్వాధీనం చేసుకోవడం తగదన్నారు. అలా చేస్తే ఇక్కడే ఆత్మహత్య చేసుకుంటామని గత రెండు రోజులుగా రాత్రీ పగలు అని తేడా లేకుండా పురుగుల మందు డబ్బా పట్టుకొని పొలంలోనే బైఠాయించారు.
