LANDS VALUE: గుంటూరు జిల్లా కేంద్రానికి సమీపంలోని భూములన్ని జిల్లా తూర్పు నియోజకవర్గం పరిధిలోకి వస్తాయి. చెన్నై-కోల్‌కతా జాతీయ రహదారి వెంట ఈ పొలాలు ఉన్నాయి. గతంలో ఇక్కడ భూములు ఎకరా ప్రభుత్వం ధర 9లక్షల లోపే ఉండేది. అయితే సీఆర్డీఏ ఏర్పడిన తర్వాత దాని పరిధిలోని భూముల ధరలను ప్రభుత్వం పెంచింది. అధికారులు తెలిసి చేశారో, తెలియక చేశారో గానీ.. ఈ ప్రాంతంలో ఎకరం విలువ నాలుగున్నర కోట్ల నుంచి 7కోట్ల రూపాయలుగా పేర్కొన్నారు. ఈ నిర్ణయంతో రైతులు తీవ్ర ఇబ్బందులు పడుతున్నారు.
ప్రభుత్వ ధర ప్రకారం ఎవరైనా ఇక్కడ భూమి కొంటే 45లక్షల నుంచి 60లక్షల రూపాయల వరకూ రిజిస్ట్రేషన్ ఛార్జీల రూపంలో చెల్లించాల్సి ఉంటుంది. ఒకవేళ 2లేదా 3కోట్లకు అమ్మితే క్యాపిటల్ గెయిన్స్ కింద ప్రభుత్వానికి కోటి నుంచి కోటిన్నర రూపాయల వరకూ చెల్లించాలి. ఇక రైతుకు మిగిలేదేమీ ఉండదు. సీఆర్డీఏ పరిధిలో ఎక్కడా కూడా వ్యవసాయ భూములు ఇంత ధర లేవు. ఈ ప్రాంతంలో కనీసం మౌళిక వసతులు కూడా సరిగా లేవు. అలాంటి చోట అధిక విలువు నిర్ణయించటం ఏమిటని రైతులు ప్రశ్నిస్తున్నారు.
దాదాపు 15వందల ఎకరాల భూమి.. ఇలా అమ్మకాలు, కొనుగోళ్లు లేకుండా ఉండిపోయింది. ఏదైనా అవసరం వచ్చి అమ్ముదామంటే కొనేవారు లేక రైతులు ఇబ్బందులు పడుతున్నారు. మా భూములు మేం అమ్ముకునేందుకు కూడా అవకాశం లేకుండా పోయిందని ఆవేదన వ్యక్తం చేస్తున్నారు. తమ సమస్యపై కలెక్టర్, సీఆర్డీఏ కమిషనర్, రిజిస్ట్రేషన్ల శాఖ డీఐజీతో పాటు.. చాలా మంది అధికారుల్ని కలిశారు. ఎమ్మెల్యేలు, ఎంపీల దృష్టికి సమస్య తీసుకెళ్లారు. అయినా ఫలితం లేదు. కలెక్టరేట్లో జరిగే స్పందన కార్యక్రమంలోనూ రైతులు ఫిర్యాదు చేశారు.
ప్రభుత్వం ఇక్కడి భూముల విలువ తగ్గించాలని లేకుంటే నిరాహారదీక్షలకు సిద్ధమవుతామని హెచ్చరిస్తున్నారు. రైతులు ఈ భూముల్లో గతంలో వరితో పాటు ఇతర పంటలు పండించేవారు. అయితే నగరంలోని డ్రైనేజి నీరు శివారు ప్రాంతాలకు వెళ్తుంది. ఆ డ్రైనేజి నీరు ఈ భూముల్లోకి లీకేజి అవుతుండటంతో పంటలు వేయటం ఆపివేశారు. కేవలం పశుగ్రాసమే సాగు చేస్తుండటం వల్ల ఆదాయం రావటం లేదు. అలాగని అమ్ముకునే అవకాశం లేకపోయిందని వాపోతున్నారు.
ఇవీ చదవండి:
