BABU COMMENTS : రానున్న ఎన్నికల్లో పొత్తులపై చంద్రబాబు స్ఫష్టతనిచ్చారు. రాష్ట్రం కోసం అవసరాన్ని బట్టి నిర్ణయం తీసుకుంటామని వెల్లడించారు. ఇప్పటివరకు పొత్తుల గురించి నేనెక్కడా మాట్లాడలేదని.. పొత్తుల గురించి నాయకుల్లో స్పష్టత ఉండాలని పేర్కొన్నారు. కేంద్రం లేదా రాష్ట్రంలో రాష్ట్ర పునఃనిర్మాణం కోసం చేసే కార్యక్రమాలకే తమ ప్రాధాన్యమని తేల్చిచెప్పారు. పోలీసులు లేకుండా వస్తే వైకాపానో, తెలుగుదేశం పార్టీనో తేల్చుకునేందుకు సిద్ధమని ముఖ్యమంత్రి జగన్కు సవాల్‌ విసిరారు. త్వరగా ఎన్నికలు వస్తే రాష్ట్రానికి పట్టి పీడ వదిలిపోతుందని.. నెత్తిన ఉన్న కుంపటిని ఎప్పుడు దించుకుందామా అని ప్రజలు ఎదురు చూస్తున్నారని వెల్లడించారు. జగన్మోహన్ రెడ్డి అవినీతి రూ.2లక్షల కోట్లు దాటిపోయిందని ఆరోపించారు.
అమాంతం పెరిగిన జగన్ ఆస్తులు : రాష్ట్రంలో జగన్ ఆస్తులు పెరిగి జనం జీవన ప్రమాణాలు పడిపోతున్నాయని చంద్రబాబు మండిపడ్డారు. అవినీతిని క్రమబద్ధీకరిస్తున్నారనటానికి లేపాక్షి భూముల వ్యవహారమే ఉదాహరణ అని ధ్వజమెత్తారు. జగన్ పాలనలో ప్రజల ఆదాయం పెరగలేదు కానీ వైకాపా నేతల ఆదాయం మాత్రం విపరీతంగా పెరిగిందని విమర్శించారు. సొంత సంస్థలకు ఇష్టానుసారం కేటాయింపులు, అనుమతులు ఇస్తున్నారని ఆక్షేపించారు. మూడున్నరేళ్ల జగన్ రెడ్డి పాలనలో విజన్ లేని విధ్వంసమే ఎక్కువని, ఒక్కో కుటుంబంపై రూ. 3.25లక్షల అదనపు ఆర్థిక భారం వేశారని మండిపడ్డారు. స్థానిక సంస్థల్ని నిర్వీర్యం చేయటంతో ఏ సర్పంచ్ ఆనందంగా లేరని వాపోయారు.
క్విట్ జగన్.. సేవ్ ఆంధ్రప్రదేశ్: తెలుగుదేశం పార్టీ పేరు చెప్తేనే వైకాపాలో వణుకు మొదలవుతోందని ధ్వజమెత్తారు. తెలుగుదేశం పార్టీలో పోరాడేవారు తయారు కావాలని.. వారిని పార్టీలో ఉన్నపెద్ద మనుషులు తయారు చేయాలని సూచించారు. న్యాయబద్ధంగా, రాజకీయంగా పోరాడి రాష్ట్రాన్ని కాపాడుకునేందుకు "క్విట్ జగన్.. సేవ్ ఆంధ్రప్రదేశ్" నినాదాన్ని ముందుకు తీసుకెళ్లాలని పిలుపునిచ్చారు. ముఠా రాజకీయలు, ఫ్యాక్షనిజాన్ని అంతం చేసిన ఘనత తెలుగుదేశానిదేనని గుర్తు చేశారు. వ్యవస్థలు నాశనం కావటంతో రాష్ట్రంలో వైకాపా నేతలకు కూడా భద్రత లేదని విమర్శించారు. వైకాపా ప్రభుత్వం ఇదే మాదిరిగా ఉంటే ప్రజలకు భవిష్యత్తు ఉండదన్నారు.
ఇకపై ఎన్నికల్లో తెదేపా పోటీ అనివార్యం : నేతలు ఎప్పటికప్పుడు ఓటర్ జాబితా పరిశీలించుకోకపోతే తెలుగుదేశం ఓట్లు తీసేసి.. వైకాపా నాయకులు దొంగ ఓట్లను చేరుస్తారని చంద్రబాబు ధ్వజమెత్తారు. ఇక నుంచి ఏ ఎన్నిక వచ్చినా తెదేపా పోటీ అనివార్యమని తేల్చిచెప్పారు. గెలుపే ధ్యేయంగా పోరాడాలని నేతలకు పిలుపునిచ్చారు. పట్టభద్రుల ఎన్నికలకు సిద్ధం కావాలంటూ సమావేశం వేదికగా అభ్యర్థుల్ని ప్రకటించారు. పశ్చిమ రాయలసీమకు భూమిరెడ్డి రాంగోపాల్ రెడ్డి, తూర్పు రాయలసీమ అభ్యర్థిగా కంచర్ల శ్రీకాంత్లను ఖరారు చేసినట్లు చంద్రబాబు వెల్లడించారు. విశాఖపట్నంకు త్వరలోనే అభ్యర్థిని ప్రకటిస్తామన్నారు.
రాష్ట్రంలో ఎస్సీ, ఎస్టీలు, మైనారిటీలు, మహిళలపై దాడులు పెరిగిపోయాయి. దిశ చట్టం, ప్రత్యేక పోలీసుస్టేషన్లంటూ నాటకాలాడారు. ఏజెన్సీ ప్రాంతాల్లో పౌష్టికాహారం అందించాలన్న ఆలోచన చేయట్లేదు. సరైన పౌష్టికాహారం లేక పిల్లలు చనిపోయే పరిస్థితి తీసుకొచ్చారు. ప్రశ్నిస్తే సీఎం నుంచి సమాధానం రాదు పైగా ఎదురుదాడులు చేస్తారు. రాష్ట్రంలో ఏ రైతు ఆనందంగా ఉండే పరిస్థితి లేదు. గిట్టుబాటు ధర రాక రైతులు ఆత్మహత్యలు చేసుకునే పరిస్థితి. తులను ఆదుకునే కార్యక్రమాలు ఏంచేశారో సమాధానం చెప్పాలి. -చంద్రబాబు, తెలుగుదేశం అధినేత
నేటి నుంచి ప్రతి ఇంఛార్జ్ నియోజకవర్గంలో ప్రజలకు అందుబాటులో ఉండాలని స్పష్టం చేశారు. ఇకపై ప్రతి నియోజకవర్గాన్ని త్రిసభ్య కమిటీ పర్యవేక్షిస్తుందని తెలిపారు. తెదేపాపై విషప్రచారం చేసే కొన్ని మీడియా కుట్రలను తిప్పికొట్టాలంటే సోషల్మీడియా మరింత బలోపేతం కావాలన్నారు. బాధ్యత మర్చిపోయిన కొన్ని మీడియా సంస్థలకు సామాజిక మాధ్యమాల ద్వారా వారి బాధ్యతలు గుర్తు చేస్తామన్నారు.
రాష్ట్రంలో పేదలకు అన్నదానం చేయాలంటే కోర్టుకెళ్లి అనుమతులు తెచ్చుకునే దుస్థితి నెలకొందని చంద్రబాబు ధ్వజమెత్తారు. తెలుగుదేశంపై ఎన్నిసార్లు దాడి చేసినా.. పేదల కడుపునింపే అన్నా క్యాంటీన్లు నిర్వహించి తీరుతామని తేల్చిచెప్పారు. పేదలకు అన్నం పెట్టే అన్నా క్యాంటీన్లు రద్దు చేయటంతో పాటు పెట్టేవారిపై దాడులు చేయటం దుర్మార్గమని మండిపడ్డారు. జగన్మోహన్ రెడ్డి విధ్వంసం వల్ల నష్టపోని వర్గమంటూ లేదని చంద్రబాబు విమర్శించారు.
రాష్ట్రంలో ఎస్సీలపై దాడులు : హత్యలు, అక్రమ మద్యం, ఎర్రచందనం, బియ్యం, గంజాయి సరఫరా చేసేవారికి లేని చెక్పోస్టులు.. డిమాండ్ల పరిష్కారం కోసం ఆందోళనకు దిగిన సీపీఎస్ ఉద్యోగులకు పెట్టారని ఆగ్రహం వ్యక్తం చేశారు. ప్రత్యేక హోదా తీసుకురావటం, మద్యనిషేదం, పోలవరం పూర్తి, అమరావతి నిర్మాణంపై ఎన్నికల ముందు అసత్య హామీలు ఇచ్చారని దుయ్యబట్టారు. నేటి పాలకుల్లో విద్వేషం పెరిగి సమాజానికి విషంగా మారుతున్నారని ధ్వజమెత్తారు.
ఎస్సీ సామాజిక వర్గానికి చెందిన వైద్యుడు సుధాకర్తో ప్రారంభమైన విద్వేషం కానిస్టేబుల్ ప్రకాష్ వరకూ కొనసాగుతూనే ఉందని మండిపడ్డారు. పాలకులకు విజన్ ఉండాలి కానీ విద్వేషం ఉండకూడదని హితవు పలికారు. ఎవరైనా సమస్యపై గళమెత్తినా, తప్పని చెప్పినా వారిని చంపటమే ధ్యేయంగా పెట్టుకుంటున్నారని చంద్రబాబు ఆక్షేపించారు. ప్రజలు గుర్తుపెట్టుకోకపోయినా, ఓట్లేయేకపోయినా 27ఏళ్ల క్రితం నుంచి ప్రారంభించిన అభివృద్ధి శాశ్వతమనే తృప్తి తనకుందని చంద్రబాబు పేర్కొన్నారు. ప్రజల్ని పరిపాలనలో భాగస్వామ్యం చేసిన పార్టీ తెలుగుదేశం అని, అభివృద్ధి వికేంద్రీకరణకు ఎన్టీఆర్ శ్రీకారం చుట్టారని స్పష్టం చేశారు. రాజకీయాల ద్వారా ప్రజలకు సేవ ఎలా చేయాలో ఎన్టీఆర్ చూపించారని తెలిపారు.
ఇవీ చదవండి:
