సత్తా చాటిన ఏపీ వైద్య ఆరోగ్య శాఖ.. 8 జాతీయ స్థాయి అవార్డులు కైవసం..

Tuberculosis Prevention Day: ఆంధ్రప్రదేశ్ వైద్య ఆరోగ్య శాఖ మరోసారి తన సత్తా చాటింది. క్షయ వ్యాధి నివారణకు సంబంధించిన 8 జాతీయ అవార్డులను సొంతం చేసుకుంది. ప్రపంచ క్షయ నివారణ దినోత్సవం సందర్భంగా వారణాసిలో జరిగిన కార్యక్రమంలో పాల్గొన్న ప్రధాని మోదీ.. అధికారులకు ఈ అవార్డులను అందజేశారు.

Tuberculosis Prevention Day: క్షయ వ్యాధి నివారణకు సంబంధించి 8 జాతీయ స్థాయి అవార్డులను సొంతం చేసుకుని ఆంధ్రప్రదేశ్ వైద్య ఆరోగ్య శాఖ మరోసారి తన సత్తాను చాటింది. ప్రపంచ క్షయ నివారణ దినోత్సవ సందర్భంగా ఉత్తర్​ప్రదేశ్ రాష్ట్రంలోని వారణాసిలో జరిగిన ప్రపంచ క్షయ నివారణ సదస్సు కార్యక్రమంలో ప్రధాని నరేంద్ర మోదీ.. అధికారులకు ఈ అవార్డులను అందజేశారు. దేశంలోని రాష్ట్రాలు, జిల్లాలను క్షయ రహితంగా తీర్చి దిద్దటంలో అధికారులు చేసిన కృషికి గుర్తింపుగా ఈ అవార్డులను ప్రదానం చేశారు.

దేశవ్యాప్తంగా 337 జిల్లాలో అమలు జరిగిన ఈ కార్యక్రమంలో 18 జిల్లాలు స్వర్ణ పతకాలను, 28 జిల్లాలు రజిత పతకాలను, 65 జిల్లాలు కాంశ్య పతకాలను సొంతం చేసుకున్నాయి. ఆంధ్రప్రదేశ్ రాష్ట్రం నుంచి ఏలూరు జిల్లా స్వర్ణ పురస్కారాన్ని దక్కించుకోగా, విశాఖ పట్నం, కోనసీమ జిల్లాలు రజిత పురస్కారాలను.. శ్రీకాకుళం, అనకాపల్లి, కాకినాడ, పశ్చిమగోదావరి, గుంటూరు జిల్లాలు.. కాంశ్య పతకాలను అందుకున్నాయి. 2015-2022 మధ్య కాలంలో క్షయ వ్యాధి నివారణకు ఆయా జిల్లాల అధికార యంత్రాంగం చేసిన పనితీరుకు గుర్తింపుగా ఈ అవార్డులను అందచేశారు.

కేంద్ర క్షయ నివారణ విభాగం, చెన్నైలోని క్షయ వ్యాధి జాతీయ పరిశోధనా సంస్థల సంయుక్త ఆధ్వర్యంలో నిర్వహించిన సబ్ నేషనల్ సర్టిఫికేషన్​ని మూడు పద్ధతుల్లో అమలు చేశారు. గత ఏడాది డిసెంబర్, ఈ ఏడాది జనవరి మధ్య కాలంలో రాష్ట్ర వ్యాప్తంగా కమ్యూనిటీ సర్వేను నిర్వహించారు. ఈ సర్వేలో 2,49,208 ఇళ్లకు చెందిన 6,30,474 మంది వ్యక్తులను పరిక్షించారు. వారిలో క్షయ వ్యాధి నిర్ధారణకు గాను 7,249 మంది కళ్లె పరీక్ష నిర్వహించగా 127 మందికి క్షయ వ్యాధి లక్షణాలున్నట్లు గుర్తించారు.

ఈ సమాచారాన్ని నిక్షయ్ డేటాబేస్​లోని సమాచారంతోనూ, మందుల అమ్మకాల సమాచారంతోనూ పరిశీలించారు. జిల్లా స్థాయిలో ఆయా వైద్య కళాశాలల ఫ్యాకల్టీ సభ్యులు ఈ సమాచారాన్ని పరిశీలించి నివేదిక అందచేశారు. ఆంధ్రప్రదేశ్ రాష్ట్రంలో 2022లో 92,177 కేసులను కొత్తగా గుర్తించారు. ప్రస్తుతం 19,987 మంది చికిత్సను అందుకుంటున్నారు. అనుమానితులను పరీక్షించి వారికి ఆయా వ్యాధులకు సంబంధించిన రెగ్యులర్ చికిత్సను అందించేందుకు చర్యలు తీసుకుంటున్నారు.

ఇవీ చదవండి: