జ్వరంతో ఆస్పత్రికి వచ్చాడు.. స్ట్రెచర్‌ లేక చనిపోయాడు

ప్రభుత్వ ఆస్పత్రిలో వైద్యుల కొరత, సదుపాయాల లేమితో రోగులు తీవ్ర ఇబ్బందులు ఎదుర్కొంటున్నారు. జ్వరం వచ్చి వెళ్తే ఆస్పత్రికి స్ట్రెచర్‌ లేక రోగి మృతి చెందాడు. తిరుపతి రుయా ఆస్పత్రిలో జిల్లా కలెక్టర్‌ సందర్శించిన కాసేపటికే ఈ ఘటన చోటు చేసుకోవడం విశేషం.

తిరుపతి రుయా ఆస్పత్రిలో వైద్యుల కొరత, వసతుల లేమి రోగుల ప్రాణాల మీదకు తెస్తోంది. తీవ్ర జ్వరంతో ఆస్పత్రిలోని సాధారణ వార్డులో చికిత్స పొందుతున్న బాబు అనే వ్యక్తిని.. అత్యవసర విభాగానికి తరలించాల్సి వచ్చింది. ఆ సమయంలో స్ట్రెచర్ అందుబాటులో లేదు. స్ట్రెచర్ తీసుకొచ్చి రోగిని హడావిడిగా తరలిస్తుండగానే అతను మృతి చెందాడు. సకాలంలో అత్యవసర చికిత్స విభాగానికి తరలించి ఉంటే బాబు మృతి చెంది ఉండేవాడు కాదని బంధువులు ఆవేదన వ్యక్తం చేస్తున్నారు. రోగులను తరలించేందుకు కనీసం స్ట్రెచర్ అందుబాటులో లేకపోవడంతో రోగుల బంధువులు ఆగ్రహం వ్యక్తం చేశారు. ఆస్పత్రిలోని సమస్యలను తెలుసుకునేందుకు జిల్లా కలెక్టర్ నారాయణ్ భరత్ గుప్తా రుయాను సందర్శించిన కాసేపటికే ఈ ఘటన జరిగింది.