సేవల పునరుద్ధరణ

తిరుమలలో రథసప్తమి వేడుకలు వైభవంగా జరిగాయి. సూర్యోదయం నుంచి చంద్రోదయం వరకు సప్తగిరీశుడు సప్తవాహన సేవల్లో భక్తులకు దర్శనమిచ్చారు.

తిరుమలలో రథసప్తమి వేడుకలు ఘనంగా జరిగాయి. దేవదేవుడు సప్తవాహన సేవల్లో ఊరేగుతూ భక్తులను కటాక్షించాడు. వాహన సేవలను తిలకించేందుకు పెద్దసంఖ్యలో వచ్చిన భక్తులు స్వామివారి దివ్యమంగళరూపాన్ని దర్శించి పునీతులయ్యారు. గతంలో ఎన్నడూ లేనంతగా భక్తులు మాడవీధుల్లోకి చేరుకుని...ఉదయం నుంచి రాత్రి వరకు స్వామిసేవలో పాల్గొన్నారు. తితిదే ఏర్పాట్లపై యాత్రికులు సంతృప్తి వ్యక్తం చేశారు.

సూర్యజయంతిని పురస్కరించుకుని మంగళవారం తిరుమలలో రథసప్తమి వేడుకలను తిరుమల, తిరుపతి దేవస్థానం వైభవంగా నిర్వహించింది. ఉదయం ఐదున్నర గంటలకు ప్రారంభమైన వాహనసేవలు రాత్రి తొమ్మిది గంటల వరకూ కన్నులపండువగా సాగాయి. మొదటగా స్వామివారు సూర్యప్రభవాహనంపై సూర్యనారాయణమూర్తిగా ఊరేగుతూ పడమర, ఉత్తర మాడవీధులు కలిసే ప్రాంతానికి చేరుకున్నారు. అక్కడ స్వామివారిపై సూర్యకిరణాలు తాకిన అనంతరం అర్చకులు... కర్పూర హారతులు, నైవేద్యాలు సమర్పించిన తర్వాత వాహన సేవలు ప్రారంభమయ్యాయి. చిన్నశేష, గరుడ, హనుమంత వాహన సేవల్లో దర్శనమిచ్చారు. మధ్యాహ్నం రెండు గంటలకు శ్రీవారి పుష్కరిణిలో చక్రస్నానం కార్యక్రమాన్ని శాస్త్రోక్తంగా నిర్వహించారు. ఈ సమయంలో వేలాది మంది భక్తులు పుణ్యస్నానాలాచరించారు.
ఉదయం జరిగిన వాహన సేవల్లో మలయప్పస్వామి మాత్రమే దర్శనమివ్వగా.... మధ్యాహ్నం తరువాత కల్పవృక్ష, సర్వభూపాల వాహన సేవల్లో శ్రీదేవీ, భూదేవీ సమేత శ్రీవారు తిరుమాడవీధుల్లో ఊరేగుతూ భక్తులను కటాక్షించారు. సాయం సంధ్యవేళలో, చల్లని వెన్నెల సమయంలో చంద్రప్రభను అధిరోహించిన తిరుమలేశుడు తిరువీధుల్లో విహరిస్తూ భక్తులను ఆనందపరవశానికి గురి చేశారు.

తిరుమాడ వీధుల్లో ఊరేగుతున్న స్వామివారు

వాహనసేవల్లో కళాబృందాల ప్రదర్శనలు ఆకట్టుకున్నాయి. మహిళల కోలాటాలు, భజనలు, వివిధ దేవతామూర్తుల వేషధారణలతో తిరుమాడవీధుల్లో ఆడిపాడారు. రథసప్తమి వేడుకలు తిలకించేందుకు పెద్ద సంఖ్యలో తరలి వచ్చిన యాత్రికులతో తిరుమాడవీధులు పూర్తిగా నిండిపోయాయి.

రథసప్తమిని పురస్కరించుకుని మంగళవారం రద్దు చేసిన ఆర్జిత సేవలు, ప్రత్యేక దర్శనాలను తిరిగి పునరుద్దరించారు.