అనంతపురం జిల్లా విడపనకల్ మండలం ఆర్. కొట్టాల గ్రామానికి చెందిన ఓ వ్యాపారి కుటుంబంలో వారం వ్యవధిలొనే ముగ్గురు మరణించారు. సందేహించిన వైద్యులు రెండు దఫాలుగా ఆ కుటుంబ సభ్యులకు కరోనా పరీక్షలు నిర్వహించగా ముగ్గురికి వైరస్ లక్షణాలు బయటపడ్డాయి. వారితో సన్నిహితంగా ఉన్న మరి కొంతమందికీ పరీక్షలు నిర్వహించగా ఏకంగా 8 మందికి పాజిటివ్ లక్షణాలు కనిపించాయి. వారిలో ఆరుగురు ఒకే కుటుంబ సభ్యులు కాగా ఇద్దరు వారి ఇంట్లో పని చేసేవారు.
గతంలో వారి కుటుంబ సభ్యుల్లో మరణించిన వారు కూడా కరోనాతోనే మరణించి ఉంటారని వైద్యులు, గ్రామస్థులు భావిస్తున్నారు. అయితే మరణించిన ఆ ముగ్గురి అంత్యక్రియల్లో గ్రామ ప్రజలు పెద్ద ఎత్తున పాల్గొనటంతో అందరూ ఆందోళన చెందుతున్నారు. ఎనిమిది మందికి వైరస్ లక్షణాలు బయటపడడంతో అధికారులు అప్రమత్తం అయ్యారు. గ్రామాన్ని కంటైన్మెంట్ జోన్ గా ప్రకటించారు. హైపోక్లోరైడ్, బ్లీచింగ్ తో శుభ్రం చేస్తున్నారు.
ఇవీ చదవండి: గ్రామ వాలంటీర్ అనుమానాస్పద మృతి
