భారత యువ క్రికెటర్ రిషభ్ పంత్ ఆరోగ్యానికి సంబంధించి ఓ శుభవార్త వచ్చింది. రిషబ్ పంత్ ఆరోగ్యం మునుపటి కంటే మెరుగు పడినట్లుగా వైద్యులు తెలిపారు. అతడిని ఐసీయు నుంచి ప్రత్యేకంగా కేటాయించిన గదికి మార్చినట్లుగా వైద్యులు వెల్లడించారు. ఇన్ఫెక్షన్లు వస్తాయేమోనన్న ఆందోళనతో అతడిని ప్రత్యేక గదికి మార్చినట్లు తెలిపారు. ప్రస్తుతం దెహ్రాదూన్లోని మ్యాక్స్ ఆసుపత్రిలో పంత్ చికిత్స పొందుతున్నాడు. కాగా, పంత్ కాలికి లిగ్మెంట్‌ చికిత్స ఎక్కడ చేయించాలనేది బీసీసీఐ నిర్ణయం తీసుకొనుందని సమాచారం.
సీఎం పరామర్శ:
ఉత్తరాఖండ్ ముఖ్యమంత్రి పుష్కర్ సింగ్ ధామి ఆదివారం పంత్ను పరామర్శించారు. పంత్ ఆరోగ్యానికి సంబంధించిన వివరాలను వైద్యులను అడిగి తెలుసుకున్నారు. అనంతరం పంత్ కుటుంబ సభ్యులనూ కలిశారు. సుమారు గంటపాటు పంత్ తల్లి సరోజ్ పంత్, సోదరి సాక్షి పంత్తో మాట్లాడారు. పంత్ ఆరోగ్యం పట్ల ఆందోళన అవసరం లేదని వారికి ధైర్యం చెప్పారు.
గుంతల కారణంగానే ఇలా జరిగింది: పంత్
అయితే, ఆదివారం పంత్ను పరామర్శించిన ముఖ్యమంత్రి.. గుంతల కారణంగానే ఈ ప్రమాదం జరిగిందని పంత్ చెప్పాడని వివరించారు. ఈ సందర్భంగా పంత్కు అందిస్తున్న చికిత్స పట్ల సంతృప్తి వ్యక్తం చేసిన ఆయన.. అతడికి మెరుగైన వైద్యం కొనసాగుతుందని స్పష్టం చేశారు.
2022 డిసెంబర్ 30న దిల్లీ నుంచి రూర్కీలోని తన ఇంటికి వెళ్లే సమయంలో రిషభ్ పంత్ రోడ్డు ప్రమాదానికి గురయ్యాడు. ఉదయం 5 గంటలకు రూర్కీ సమీపంలోని నర్సన్ ప్రాంతంలో పంత్ ప్రయాణిస్తున్న కారు ప్రమాదానికి గురైంది. ఈ క్రమంలో కారులో మంటలు కూడా వచ్చాయి. స్థానికులు రూర్కీలోని ఓ ప్రైవేట్ ఆస్పత్రికి తీసుకెళ్లగా మెరుగైన చికిత్స కోసం.. వైద్యులు అతడిని దెహ్రాదూన్లోని మ్యాక్స్ ఆసుపత్రికి తరలించారు.
