ఐసీసీ మహిళల వన్డే వరల్డ్కప్ ఫైనల్లో ఆసీస్ గెలిచింది. ఇంగ్లాండ్ను 71 పరుగుల తేడాతో చిత్తుగా ఓడించి.. రికార్డుస్థాయిలో ఏడోసారి ట్రోఫీని ముద్దాడింది. మొత్తం 12 ప్రపంచకప్పుల్లో ఆసీస్ 7 సార్లు గెలవగా.. ఇంగ్లాండ్ 4, న్యూజిలాండ్ ఓసారి విజేతలుగా నిలిచాయి. తొలుత బ్యాటింగ్ చేసిన ఆసీస్.. నిర్ణీత 50 ఓవర్లలో 5 వికెట్లకు 356 పరుగులు చేసి ఇంగ్లాండ్ ముందు భారీ లక్ష్యాన్ని నిర్దేశించింది. సెమీఫైనల్లో సెంచరీ చేసిన ఓపెనర్ అలీసా హేలీ.. ఈ మ్యాచ్లో మరింత రెచ్చిపోయింది. కేవలం 138 బంతుల్లోనే 170 పరుగులు చేసి ఆఖర్లో వెనుదిరిగింది. ఇందులో ఏకంగా 26 ఫోర్లు ఉండటం విశేషం. మహిళల ప్రపంచకప్ ఫైనల్లో సెంచరీ చేసిన రెండో బ్యాటర్గా నిలిచింది హేలీ. అంతకుముందు 2005లో ఆసీస్కే చెందిన రోల్టన్ శతకం చేసింది.
రాచెన్ హేన్స్(68), బెత్ మూనీ(62) పరుగులు చేశారు. ఇంగ్లాండ్ బౌలర్లలో ష్రబ్సోల్ 3 వికెట్లు పడగొట్టింది. అనంతరం బ్యాటింగ్ ప్రారంభించిన ఇంగ్లాండ్.. ఏ దశలోనూ గెలుపు దిశగా సాగలేదు. క్రమం తప్పకుండా వికెట్లు కోల్పోయింది. స్కివర్ మాత్రమే సెంచరీతో రాణించింది. 148 పరుగులతో నాటౌట్గా నిలిచింది. ఆమెకు సహకారం అందించే వారెవరూ లేకపోయారు. మరెవరూ కనీసం 30 పరుగులు కూడా చేయలేకపోయారు. ఆసీస్ బౌలర్లలో అలెనా కింగ్, జొనాస్సెన్ తలో 3 వికెట్లు తీయగా.. మేగన్ స్కట్ 2 వికెట్లతో రాణించింది.
ప్రపంచ రికార్డు: ఓ ఐసీసీ వరల్డ్కప్ ఫైనల్లో అత్యధిక పరుగులు చేసిన బ్యాటర్గా ప్రపంచ రికార్డు సృష్టించింది హేలీ. పురుషుల క్రికెట్లోనూ ఈ రికార్డు సాధ్యం కాలేదు. ఆసీస్ విధ్వంసకర ఓపెనర్, మాజీ ప్లేయర్ ఆడం గిల్క్రిస్ట్ 2007 పురుషుల క్రికెట్ వరల్కప్ ఫైనల్లో చేసిన 149 పరుగులే ఇప్పటివరకు అత్యుత్తమంగా ఉంది. ఇప్పుడు చిరస్మరణీయ ఇన్నింగ్స్ ఆడిన హేలీ.. దాన్ని బ్రేక్ చేసింది. మహిళల వరల్డ్కప్ ఎడిషన్లో అత్యధిక పరుగులు చేసిన జాబితాలో కూడా హేలీ అగ్రస్థానంలో నిలిచింది. ప్రస్తుత ప్రపంచకప్లో 9 ఇన్నింగ్స్ల్లో 56.56 సగటుతో 509 పరుగులు చేసింది. ఇందులో రెండు సెంచరీలు ఉన్నాయి. దీంతో ప్లేయర్ ఆఫ్ ది టోర్నమెంట్గా నిలిచింది.
ఇదీ చూడండి: హేలీ ప్రపంచ రికార్డు.. గిల్క్రిస్ట్ రికార్డు బద్దలు
