హైదరాబాద్లో ఓ వ్యాపారి బ్యాంకు ఖాతాల నుంచి 36 లక్షల రూపాయలు కాజేసిన సైబర్ నిందితున్ని పోలీసులు అరెస్ట్ చేసి, రిమాండ్కు తరలించారు. ఇప్పటికే ఈ కేసులో కోల్కతాకు చెందిన ముగ్గురిని అరెస్ట్ చేయగా, తాజాగా విశాఖపట్నం వాసి చిరంజీవిని అరెస్ట్ చేశారు. వ్యాపారికి చెందిన సిమ్ కార్డును స్వాపింగ్ చేసి నగదు లావాదేవీల వివరాలు చరవాణి, మెయిల్కు సందేశం వచ్చేలా ఏర్పాట్లు చేసుకున్నట్లు పోలీసులు గుర్తించారు.
సెప్టెంబర్ నాలుగో తేదీ తన ఖాతాల్లో డబ్బులు పోయాయని గుర్తించిన వ్యాపారి వెంటనే సైబర్ క్రైం పోలీసులకు ఫిర్యాదు చేశాడు. నిందితుడు చిరంజీవి ఓ బ్యాంకు ఖాతాను తెరిచి సైబర్ నేరగాళ్లతో నగదును తన ఖాతాలోకి బదిలీ అయ్యేలా ఒప్పందం చేసుకున్నాడని పోలీసుల దర్యాప్తులో తేలింది. అపరిచిత వ్యక్తుల నుంచి వచ్చే సందేశాల పట్ల ప్రజలు అప్రమత్తంగా ఉండాలని సైబర్ క్రైం పోలీసులు సూచిస్తున్నారు.
