తెలంగాణ.. జగిత్యాల జిల్లా కోరుట్లకు చెందిన రాజ భూషణానికి సరూర్నగర్ చెందిన నాగభూషణంకు మధ్య డబ్బుల లావాదేవీలు కొనసాగుతున్నాయి. రాజ భూషణానికి నాగభూషణం ఇచ్చే డబ్బులు ఇవ్వకుండా ఇబ్బందులకు గురి చేస్తున్నాడు. విసుగు చెందిన రాజ భూషణం అజీజ్ అనే రౌడీ షీటర్తో కలిసి కిడ్నాప్ వ్యూహరచన చేశారు. ఇందులో భాగంగా సోమవారం సరూర్నగర్లో ఐదుగురు దుండగులు నాగభూషణాన్ని కిడ్నాప్ చేశారు. వారు టీఎస్ 08 ఎఫ్హెచ్ 7577 నెంబరు గల కారులో జగిత్యాల వైపు బయల్దేరారు.
ఇది గుర్తించిన నాగభూషణం కుటుంబ సభ్యులు సరూర్నగర్ పోలీస్ స్టేషన్లో ఫిర్యాదు చేశారు. అక్కడి పోలీసులు అన్ని పోలీసు స్టేషన్లకు సమాచారం ఇచ్చారు. జగిత్యాల జిల్లా వైపు వచ్చిన నిందితులు కొండగట్టు దొంగల మర్రి చెక్ పోస్ట్ వద్ద పోలీసులను చూసి కారును మరో మార్గంలో అతి వేగంగా తీసుకెళ్లారు. అదే వేగంతో కొడిమ్యాల పోలీసులు వెంబడించి కొడిమ్యాల శివారులో పట్టుకున్నారు. ఐదుగురు దుండగుల్లో ఇద్దరు పారిపోగా... ముగ్గురు పోలీసులకు చిక్కారు.
కిడ్నాపైన నాగభూషణం, నిందితులను పోలీస్ స్టేషన్కు తరలించారు. సమాచారమందుకున్న జగిత్యాల డీఎస్పీ వెంకటరమణ, సీఐ కిషోర్ కొడిమ్యాల పోలీస్ స్టేషన్కు చేరుకొని కిడ్నాప్ వివరాలను తెలుసుకున్నారు. దుండగులను పట్టుకున్నట్లు సరూర్నగర్ పోలీసులకు సమాచారం ఇచ్చారు.
ఇదీ చదవండి: ఐపీఎల్: ముంబయి వేగాన్ని రాయల్స్ ఆపగలదా?
