ఉగ్ర కార్యకలాపాలకు నిధులు సమకూర్చిన కేసులో నిషేధిత ఉగ్రవాద సంస్థ లష్కరే-యి-తొయిబాకు చెందిన సాజీద్ మజీద్కు శిక్ష పడింది. 2008 ముంబయి పేలుళ్ల సూత్రధారి అయిన మజీద్కు 15 ఏళ్ల జైలు శిక్షను ఖరారు చేసింది పాకిస్థాన్ యాంటీ టెర్రరిజం కోర్టు. దీంతో పాటు రూ.4 లక్షల జరిమానా విధించింది. కొంతకాలం క్రితం సాజిద్ మీర్ మరణించినట్లు పాకిస్థాన్ వర్గాలు వెల్లడించాయి. కానీ పాశ్చాత్య దేశాలు ఆధారాలు కావాలంటూ కోరాయి. దీంతో దర్యాప్తు మొదలుపెట్టిన పాకిస్థాన్ టాస్క్ఫోర్స్ సాజిద్ను అరెస్ట్ చేసింది. పంజాబ్ కౌంటర్ టెర్రరిజం పోలీసులు సాధారణంగా ఇలాంటి కేసుల్లో మీడియాకు వివరాలు వెల్లడిస్తారు. కానీ దీనికి సంబంధించిన విషయాలను బహిర్గత పరచలేదు. సాజిద్ను అరెస్ట్ చేసినందున తమను గ్రే లిస్టు నుంచి తొలగించాలని పాకిస్థాన్ కోరినట్లు స్థానిక మీడియా తెలిపింది. 40 ఏళ్ల సాజిద్పై అమెరికా 5 మిలియన్ డాలర్ల నజరానా ప్రకటించింది. అతడు ఏప్రిల్లో అరెస్ట్ కాగా.. ప్రస్తుతం కోట్ లఖ్పత్ జైలులో ఉన్నట్లు సీనియర్ న్యాయవాది తెలిపారు.
2005లో నకిలీ పాస్పోర్టుతో భారత్కు వచ్చి వెళ్లిన సాజిద్.. 2008 నవంబర్ 11న పాకిస్థాన్ నుంచి సముద్ర మార్గం గుండా పది మంది ఉగ్రవాదులతో కలిసి ముంబయి చేరుకున్నాడు. అనంతరం నగరంలోని 12 ప్రాంతాలపై దాడి చేసి 166 మంది పౌరులను పొట్టన పెట్టుకున్నారు. ఈ నరమేధంలో ఆరుగురు అమెరికా పౌరులు కూడా మృతిచెందారు.
అంతకుముందు ముంబయి పేలుళ్ల ప్రధాన సూత్రధారి హఫీజ్ సయీద్ 68 ఏళ్ల జైలు శిక్ష విధించింది లాహోర్ ఉగ్రవాద వ్యతిరేక కోర్టు. అతడు ప్రస్తుతం శిక్ష అనుభవిస్తున్నాడు. లష్కరే-యీ-తొయిబా అనుబంధ సంస్థగా పనిచేస్తున్న జేయూడీని విదేశీ ఉగ్రవాద సంస్థగా 2014లోనే గుర్తించింది అమెరికా. సయీద్ను అంతర్జాతీయ ఉగ్రవాదిగా ప్రకటించిన అగ్రరాజ్యం.. అతని ఆచూకీ తెలిపిన వారికి 10 మిలియన్ డాలర్లు బహుమానం ఇస్తామని తెలిపింది.
ఇదీ చదవండి: అఫ్గాన్‌లో 1,150కి చేరిన మృతుల సంఖ్య.. మరోసారి కంపించిన భూమి
