అమెరికా ఎన్నికలు సమీపిస్తున్న నేపథ్యంలో రోజురోజుకూ రాజకీయ సమీకరణాలు మారుతున్నాయి. ప్రతిష్టాత్మకంగా జరుగుతున్న ఈ ఎన్నికల్లో భారతీయ-అమెరికన్ ఓటర్లు కీలకం కాగా వారు.. వారు ఎటువైపు ఉన్నారనే దానిపై ఆసక్తి నెలకొంది. ఇప్పటివరకు రిపబ్లికన్ పార్టీ అభ్యర్థి, ప్రస్తుత అధ్యక్షుడు డొనాల్డ్ ట్రంప్కు భారత సంతతికి చెందిన ఓటర్ల మద్దతు అంతగా లేకపోగా.. క్రమంగా పెరుగుతున్నట్లు తాజా సర్వే చెబుతోంది. అయితే ఇప్పటికీ మెజార్టీ ఇండియన్-అమెరికన్ ఓటర్లు డెమొక్రటిక్ పార్టీ అభ్యర్థి బైడెన్ వైపే ఉన్నారని ఇండియాస్పోరా, ఆసియా అమెరికన్లు- పసిఫిక్ ద్వీపవాసులు ( ఏఏపీఐ) డేటా కలిసి రూపొందించిన ఓ నివేదిక ద్వారా తెలిసింది.
మారుతున్న లెక్కలు
ప్రస్తుతం అమెరికాలో 18 లక్షల మంది భారతీయ-అమెరికన్లు ఓటు వేయడానికి అర్హులు.
భారతీయ-అమెరిక్ ఓటర్లను అకర్షించేందుకు, భారత్తో బలమైన బంధాన్ని నెలకొల్పేందుకు కమలా హారిస్ను ఉపాధ్యక్ష బరిలో దింపారు బైడెన్. దీని ద్వారా భారత సంతతి ఓటర్ల మద్దతును బైడెన్ బాగా ఆకర్షించగలిగారని సర్వేలు చెప్పాయి.
అయితే ఏఏపీఐ చేసిన తాజా సర్వే మాత్రం గతంతో పోలిస్తే ట్రంప్కు మన వాళ్ల మద్దతు పెరిగినట్లు తేల్చింది. 66 శాతం మంది ప్రస్తుతం బైడెన్‌కు, 28 శాతం మంది ట్రంప్కు అనుకూలంగా ఉండగా, ఆరు శాతం మంది ఏ నిర్ణయాన్ని వెల్లడించలేదని చెప్పింది.
2016 అధ్యక్ష ఎన్నికల్లో 77 శాతం మంది హిల్లరీ క్లింటన్‌కు, 16 శాతం ట్రంప్కు ఓటు వేశారు. 2012లో భారతీయ-అమెరికన్లు 84 శాతం మంది బరాక్ ఒబామాకు ఓటు వేశారు. ఈ ఎన్నికల్లో ట్రంప్ దాదాపు 30శాతం మంది ఓటు వేసే అవకాశం ఉందని ఏఏపీఐ డేటా వ్యవస్థాపకుడు, కాలిఫోర్నియా విశ్వవిద్యాలయంలో పబ్లిక్ పాలసీ అండ్ పొలిటికల్ సైన్స్ ప్రొఫెసర్ డాక్టర్ కార్తీక్ రామకృష్ణన్ పేర్కొన్నారు.
భారతీయ-అమెరికన్ల విషయంలో డెమొక్రాట్లు జాగ్రత్తగా ఉండాలని భారతీయ-అమెరికన్ కాంగ్రెస్ సభ్యుడు రాజా కృష్ణమూర్తి సూచించారు.
"డెమొక్రాట్లు భారతీయ-అమెరికన్ల పట్ల తగిన విధంగా ప్రవర్తించాలి. ఎన్నికల్లో ప్రతి ఓటూ కీలకమనే విషయాన్ని గుర్తుంచుకోవాలి."
-రాజా కృష్ణమూర్తి, అమెరికా చట్ట సభ్యుడు
ప్రముఖులు ఏమన్నారంటే..
- అయితే ఈ సర్వే ఫలితాలను అంతగా నమ్మలేమంటున్నారు హార్వర్డ్ లా స్కూల్ లేబర్ అండ్ వర్క్‌లైఫ్ ప్రోగ్రాం డెమొక్రటిక్ నేషనల్ కమిటీ మాజీ సీఈఓ సీమా నందా.
- భారత సంతతి ఓటర్ల ప్రాముఖ్యం భవిష్యత్లో మరింత పెరుగుతుందన్నారు ఇండియాస్పోరా వ్యవస్థాపకుడు ఎం.ఆర్.రంగస్వామి.
- భారతీయ-అమెరికన్లకు దగ్గర కావడానికి ట్రంప్ పెద్ద ప్రయత్నమే చేశారని కార్నెగీ ఎండోమెంట్ ఫర్ ఇంటర్నేషనల్ పీస్ సౌత్ ఆసియా ప్రోగ్రాం డైరెక్టర్ మిలన్ వైష్ణవ్ అన్నారు. భారత ప్రధాని మోదీ చిత్రాన్ని ప్రచారంలో వాడుకున్నారని గుర్తుచేశారు.
